مقاومت جبهې له طالبانو سره په جګړه کې د خپل یوه قومندان وژل کېدل تایید کړ
د مقاومت جبهې مشر احمد مسعود په خپلو تازه څرګندونو کې منلې ده، چې د دوی یو قومندان قیوم کهګدای د بغلان ولایت په نهرین ولسوالۍ کې له طالبانو سره په جګړه کې وژل شوی دی.
د مقاومت جبهې مشر احمد مسعود په خپلو تازه څرګندونو کې منلې ده، چې د دوی یو قومندان قیوم کهګدای د بغلان ولایت په نهرین ولسوالۍ کې له طالبانو سره په جګړه کې وژل شوی دی.
د یادې جبهې مشر د چهارشنبې په ورځ په یوه پیغام کې د هغه وژل کېدل تایید کړ او زیاته یې کړه، چې قیوم کهګدای تر وروستۍ شېبې پورې په سنګر کې ودرېد او خپل ژوند یې د خلکو او د هېواد د دفاع لپاره قربان کړ.
په سیمه کې سرچینو افغانستان انټرنشنل - پښتو ته ویلي، جګړه د سې شنبې په ورځ ناوخته د طالبانو او د مقاومت جبهې د جنګیالیو ترمنځ رامنځته شوې وه.
د سرچینې په وینا ، دا نښته شاوخوا یو ساعت روانه وه او دواړو خواوو ته یې مرګ ژوبله اړولې ده، خو د دقیقو شمېرو په اړه یې معلومات نه دي ورکړل شوي.
قیوم کهګدای د ملي مقاومت له هغو قومندانانو څخه و، چې په بغلان او شاوخوا سیمو کې یې د طالبانو پر وړاندې فعالیت درلود.
د هغه وژل کېدل د دې جبهې لپاره یو لوی تاوان بلل کېږي، ځکه نوموړی د خپلو ځواکونو په منځ کې د زړورتیا او مقاومت په نوم پېژندل کېده.
دا په داسې حال کې ده، چې په نهرین ولسوالۍ کې په تېرو کلونو کې څو ځله د طالبانو او مقاومت ترمنځ جګړې شوې دي. د تېر کال په ورته نښتو کې د مقاومت جبهې دوه نور قومندانان عبدالصمد کهګدای او خیرالله هم وژل شوي وو.
یاده جبهه وايي، دوی به د طالبانو پر وړاندې خپلې مبارزې ته دوام ورکړي، خو طالبان د دغې جبهې موجودیت او فعالیتونه په پرلهپسې ډول ردوي.
شنونکي باور لري، چې په شمالي ولایتونو کې د طالبانو او د مقاومت جبهې ترمنځ وخت ناوخت نښتې ښيي چې وسلهوال مخالفتونه تر اوسه هم د پای ته رسېدو پر ځای په ځینو سیمو کې دوام لري.
