د طالبانو د افغانستان بانک رییس نور احمد اغا د سېشنبې په ورځ (د تلې ۱۵مه) د دغه بانک په عالي شورا غونډه کې وویل، په تېر یوه کال کې افغانۍ د ډالر پر وړاندې خپل ارزښت ثابت ساتلی او په وینا یې افغانۍ د سیمې او نړۍ د ډېرو هېوادونو د اسعارو پرتله د ښه کېدو په حال کې ده.
نور احمد اغا په دغې غونډه کې چې ځینو غړو یې په انلاین بڼه حضور درلود، زیاته کړه، چې د بانکونو د شتمنیو، مدیریت او نقدینګۍ وضعیت په وروستیو میاشتو کې د پام وړ ښه شوی دی.
نوموړي همداراز د پولي سیاستونو د اغېزناک تطبیق، د بانکولۍ سکتور د عمومي وضعیت، په هېواد کې د اسلامي بانکولۍ د پراختیا د هڅو، د صرافیو او پولي خدمتونو د فعالیتونو د میکانیزه کولو او مالي خدمتونو ته د خلکو د اسانه لاسرسي په اړه هم څرګندونې وکړې.
د یادونې وړ ده، چې د افغانستان بانک عالي شورا د دغه بانک د پرېکړې کولو تر ټولو لوړه مرجع ده، چې په کال کې څلور ځله غونډې کوي او د بانک د اساسي تګلارو او ستراتیژیو د رهبرۍ مسوولیت پر غاړه لري.
