د پاکستان د دفاع وزیر خواجه اصف ویلي، هند ممکن اوس د افغانستان له لارې د غچ اخیستلو هڅه وکړي او په افغانستان کې نوي ډیلي ته دا اسانتياوي برابريږي. نوموړي زياته کړې« هیڅوک د مذاکراتو څخه انکار نه کوي؛ خو که د خبرو له لارې حل پيدا شي، څوک به د هغه تضمين وکړي؟»
د پاکستان د دفاع وزير د جیونیوز په «اج شاه زیب خانزاده کې سات» په یوه پروګرام کې ویلي: «موږ هڅه وکړه، چې طالبان قانع کړو؛ څو ترهګرو ته پناه ځایونه ور نه کړي.»
نوموړي ویلي، چې طالبانو بل ځای ته د ترهګرو د لېږد لپاره پيسې غوښتې او دوی اندېښنه درلوده، چې د پيسو په ورکړه سره به ستونزه حل نه شي او ترهګر به بیا پخوانیو پناه ځایونو ته ستانه شي.
د دفاع وزیر په خبره، چې حکومت یې د خبرو لپاره تیار دی؛ خو افغان لوری ضمانت ورکولو ته تیار نه دی.
نوموړي ویلي: «د پاکستاني طالبانو تحریک مشر ته هلته د مرمۍ ضد موټر ورکړل شوی، ترهګرو ته اسانتیاوي برابريږي، چې نور پټنځایونه جوړ کړی.»
هغه ادعا کړې، چې طالبانو ته یې ويلي، څو د خپلي خاورې څخه ترهګر کنټرول کړي.
خواجه اصف زیاته کړې، چې له طالبانو سره هدف مندو مذاکراتو ته تیار یو؛ خو له ناقانونه «ټي ټي پي» سره حساب باید تصفیه شي.
هغه ویلي: «د طالبانو د بهرنیو چارو وزیر په نوي ډیلي کې ناست دی او له هغه ځایه څرګندونې کوي، پوښتنه دا ده چې ایا دوی به د هند په اجازه مذاکرات کوي؟»
نوموړي د خپلو خبرو په وروستيو کې د «بنیان مرصوص» په نوم عملیاتو ته په اشارې وویل، په دې عملیاتو کې چې له هند سره څه وشول او اوس غواړي د افغانستان له لارې غچ واخلي.
