د پاکستان پخواني لومړي وزیر عمران خان په یوه پيغام کې د دغه هېواد د دفاع وزیر خواجه اصف هغه تور رد کړی، چې ویلي یې و، «د عمران خان د حکومت پر مهال ترهګرو ته په پاکستان کې ځای ورکړل شوی».
نوموړی زياته کړې: «په ۲۰۲۱ کال کې پوځي مشرتابه د هغو وسله والو د بیا ميشتېدنې لپاره پلان وړاندې کړ چې وسلې يې پر ځمکه ايښې وې، خو عملي نه شو.»
هغه پر ایکس خواله رسنۍ ویلي، د هغو وسله والو، چې وسلې يې پر ځمکه ايښي د بیا مېشتېدنې پلان د خيبر پښتونخوا او قبايلي سیمو د استازو د مخالفت سره مخ شو او د نوموړي په دوره کې پلي نه شو.
خان زياته کړې، چې حکومت د تحریک انصاف پر ګوند غلط تورنه لګوي.
هغه له ولس څخه غوښتنه کړې، چې په دې اړه له حکومت څخه وضاحت وغواړي.
د یادولو وړ ده، چې تېره ورځ د پاکستان دفاع وزیر خواجه اصف ویلي وو، چې د زنداني عمران خان د حکومت پر مهال په زرګونه وسله وال په پاکستان کې بیا مېشت کړای شول.
د پاکستان د پوځ ویاند جنرال احمد شریف چودري د جمعې په ورځ د یوه خبري کنفرانس پرمهال وویل، چې د دغه هېواد د استخباراتو د ادارې پخوانی مشر جنرال فیض حمید به په نظامي محکمه کې محاکمه شي او هغه ته به د ځان د دفاع بشپړ حق ورکړل شي.
د پاکستان د پوځ ویاند د یاد هېواد د استخباراتي ادارې (ایایسای) د پخواني مشر جنرال فیض حمید د قضيي په اړه وویل، چې د پاکستان پوځ د اوازې یا تورونو پر اساس نه، بلکې د حقایقو پربنسټ عمل کوي.
نوموړي زیاته کړه:«د پوځ اړیکه له دولت سره شخصي یا سیاسي نه وي، بلکي رسمي وي. که څوک دا اړیکې ته شخصي یا سیاسي بڼه ورکړي، نو بیا به یې د حساب ورکولو وخت هم راځي. پرېکړې د دولت له خوا کېږي، موږ یوازې خپل نظر او مشوره ورکوو، خو د هېڅ سیاسي ډلې ملاتړ نه کوو.»
د پاکستان د پوځ ویاند جنرال احمد شریف چودري وايي، د جنرال فیض حمید د نظامي محکمې له لارې محاکمه کېږي او هغه ته د بشپړې دفاع حق ورکړل شوی دی.
چودري زیاته کړه:«د یوه جنرال د نظامي محاکمه کېدو یو علت دا هم دی، چې که څوک رسمي اړیکې شخصي یا سیاسي کړي، نو د ځواب ویلو مسوولیت یې هم باید پر غاړه واخلي. موږ نه غواړو چې څوک دې پوځ د خپل سیاست برخه وګرځوي. موږ ټولو سیاسي ګوندونو ته درناوی لرو.»
د پاکستان د استخباراتي ادارې پخوانی مشر جنرال فیض حمید د دغه هېواد د پوځ د اصولو خلاف د حکومتي رازونو د افشا، له موقف څخه ناوړه ګټه اخېستنه، د دولتي وسایلو ناقانونه استفادې او د عمران خان په مشرۍ د تحریک انصاف ګوند په ګټه سیاسي فعالیتونه باندې تورن شوی.
د پاکستان د پوځ ویاند احمد شریف چودري په پېښور کې د یوه خبري کنفرانس پرمهال وویل، چې هند د افغانستان له خاورې په استفادې پاکستان کې بریدونه ترسره کوي. نوموړي زیاته کړه، چې په افغانستان کې د ترهګرو لپاره امن ځایونه او پرمختللې وسلې په واک کې ورکړل شوي دي.
احمد چودري د جمعې په ورځ (د تلې ۱۷مه) پېښور کې په یوه خبري کنفرانس کې وویل چې د نورو کلونو په پرتله په ۲۰۲۴ او ۲۰۲۵ کې په خېبرپښتونخوا کې ترهګریز بریدونه ډېر شوي دي. د ده په وینا، په دې موده کې ۱۶۱ افغانان چې د ترهګریزو پېښو په ترسره کولو کې یې لاس درلود، د پاکستان د پوځ له لوري وژل شوي، او ۳۰ ځانمرګي بریدګر هم د افغانستان تابعیت درلود.
همد ارنګه نوموړي زیاته کړې، چې ۱۳۵ بهرني وسلهوال له افغانستان څخه پاکستان ته د ننوتلو پرمهال وژل شوي دي.
چودري ویلي، چې ګڼ شمېر ترهګر له افغانستان څخه په تشکیلاتو کې پاکستان ته ورځي او ترهګریز بریدونه کوي.
نوموړي ویلي، چې د ۲۰۲۱ د اکسټ وروسته د ترهګرو لاس ته په لوړه کچه امریکايي وسلې لویدي دي. او کله چې په خېبر پښتونخوا کې ترهګر وژل کېږي له هغوی څخه امریکايي وسلې ترلاسه کېږي.
د پاکستان د پوځ ویاند احمد شریف چودري وايي، په پاکستان کې په ترهګریزو پېښو کې د افغانانو د لاس لرلو له شمېرو څرګنده شوې، چې هند د افغانستان خاوره د پاکستان پر وړاندې د خپل عملیاتي اډې په توګه کاروي.
د پاکستان دفاع وزیر خواجه اصف وايي، چې پاکستان له لسیزو راهیسې د افغان کډوالو کوربهتوب کړی؛ خو دغه مېلمه پالنه دوی ته د خپلو وینو په بیه تمامه شوې ده. نوموړي ویلي، اوس د دې وخت رارسېدلی چې ټول افغان کډوال بېرته خپل هېواد ته ستانه شي.
هغه زیاته کړې، چې پاکستان د طالبانو له حکومت سره په وار، وار مذاکرات کړي؛ خو لاهم پاکستان کې وینه تویېدنه نهده درېدلې او دوی هره ورځ د سرتېرو جنازې پورته کوي.
د پاکستان د دفاع وزیر خبرداری ورکړی، چې نور د ترهګرو ملاتړ دوی ته د منلو نهدی.
د پاکستان د دفاع وزیر په وار، وار دې ته ورته توندې څرګندونې او ادعاوې کړې دي؛ خو طالبانو بیا د پاکستان دغه ادعا چې ګواکې دوی په پاکستان کې د ورانکاره کړونو ملاتړ کوي، رد کړې دي.
نوموړي تېره ورځ هم د ملي شورا په غونډه کې ویلي و، چې اسلاماباد له ترهګرۍ ستړی شوی او هغو ته به حساب ورکول کېږي چې د ترهګرو لپاره پټنځایونه برابروي. هغه زیاته کړه، د افغانستان له خاورې ترهګریز فعالیتونه نور د زغم وړ نهدي.
هغه وویل، چې له کابل سره به یاده موضوع د یوه رسمي پلاوي له لارې وڅاري.
بېګاه شپه پر کابل پاکستانیو الوتکو بمبار وکړ، د تلفاتو او ټپیانو خبرونه ورکړل شوي دي.
د کابلمېشتو پرجسمونو دټپونو او ژوبلو تر خونړیو انځورونو ورهاخوا یو لوی، ژور او زهري ټپ د افغانانو په ګډه – تاریخي حافظه کې جوړ شوی، چې د یوه سرلوړي ملت په وړاندې دا ګستاخي به یوه مصنوعي او بېملته پوځي چوڼي ته بدې پایلې ولري.
دا لومړی ځل دی، چې یو داسې ګاونډی د افغانستان د غرور پر پایتخت بمونه اوروي، چې افغانستان ورسره د زمکې او ویشل شوي ولس دعوا لري.
د افغانستان پر پلازمېنه، کابل، لومړنۍ بمباري د افغان- انګریز درېیمې جګړې پرمهال انګریزانو وکړه. دا بمباري د دې نښه وه، چې افغان خپلواکيغوښتونکي ملت په مخامخ جبهاتو کې انګریز تر پوره فشار لاندې راوستی و.
تر دې روسته پر کابل بهرنۍ بمبارۍ شورویانو او امریکایانو وکړې، چې د درېواړه زبرځواکونو په وړاندې د افغانستان د ملت په زړه و ذهن کې تاریخي کرکه او داسې ژور نفرت رامنځته شول، چې هيڅکله به یې د دې هېواد تاریخي حافظه هېره نه کړي.
خو دا ځل کیسه توپیر لري. دا ځل پاکستان د تاریخي افغانستان پر پلازمېنه بمونه ورولي او د افغانستان زمکنۍ بشپړتیا یې تر پښو لاندې کړې ده. هغه پاکستان چې د ۱۹۸۰مې لسیزې په پای کې یې د ننګرهار په جګړه کې مخامخ پوځي مداخلهشنډه او داسې یې پوزه په خاورو وموښودل شوه ، چې بیا یې د افغانستان خوا ته راکتل هم ناشونې انګېرل کېدل. خو دا دی نن پاکستان د انګریز له لمنې د رازېږېدو له زمانې او په خپل ټول عمر کې لومړی ځل دومره جرئت وموند چې کابل بمباري کړي.
داسې ولې کیږي؟
د سړې جګړې کلونه وو، چې د برېژینسکي – کارتر د دکتورینو له مخې په افغانستان کې د «جهاد» تنور اورغړاند شو او د افغانستان د خلکو ذهن یې د افراطیت په لوګیو لوغړن کړ. لا د محمد داودخان جمهوریت واکمني وه، چې څه کسان د پېښور په بالاحصار کې وسلهوال کړل شول او په افغانستان کې یې د هرې واکمنۍ په وړاندې د جګړې لپاره روزنه پیل شوه. له دې تودې جګړې سره د تبلیغاتو او پروپاګند داسې نړیواله څپه راپورته شوه، چې په زور یې تر قیامته افغانستان دارالحرب اعلان شو. پاکستان چې غوښتل په افغانستان کې خپل ستراتیژيک عمق پالیسي عملي کړي د دې جنګ و جهاد د مدیریت ټېکه واخیسته او د څلورو پرلپسې افغان نسلونو په ذهنونو کې یې ځان دارالهجرة، دارالنصرة، دارالجهاد او قلعهی اسلام اعلان کړ او خپل خلک یې انصار وبلل. بلاتشبیه پاکستان ته یې د نبوي هجرت د زمانې د یثرب یا مدینه منورې حیثیت ورکړ.
پاکستان شپېته زره مدرسې او سلګونه معهدونه جوړ کړل، له امریکايي ډالرو رانیولې تر عربي پيسو او وسلو پورې پرې رامات شول او په دې مدرسو کې یې د بېوزلو افغان کډوالو معصوم بچیان د دیني زدکړو پرځای په افراطیت روږدي او په وسلو سمبال کړل. زرګونه چاپي خپرونې، نړیوالې راډیوګانې او روسته تلویزیونونه لګیا وو او پاکستان یې د افغانستان په قضیه کې د مقدسې زمکې په توګه معرفي کاوه. اسلام له پاکستان سره مترادف وګڼل شو او د افغان تنکیو ماشومانو په ذهنونو کې:
۱ـ پاک سرزمین شاد باد!
۲ـ مطالعه پاکستان
۳- پاکستان کا مطلب کیا، لااله الالله
ورپيچکاري کړل.
په همداسې یوه تبلیغاتي چاپېریال کې روزل شوي نسلونه رالوی شول او په افغانستان کې پرېمانه وینې وبهېدې، وطن وران شو، خپلې ملي شتمنۍ یې وبایللې، افراطیت او خرافاتو ورو ورو د معتدلې او سولهخوښې عقیدې ځای ونیوه، کابل د پاکستاني استخباراتو د شعار له مخې وسوزېد او لولپه شو.
په پاکستاني مدرسو کې رالویو شویو او روزل شویو خلیفهګانو، شیخانو او زهادو په هر دریځ او له هر لوډسپیکر څخه پاکستان ته دعاګانې پیل کړې او دا هېواد یې د اسلام مدافع وګاڼه.
اوس نو پوښتنه راپېښیږي، چېد داسې یوه واکمن نسل لپاره د پاکستان بمباري تېری اواشغال ګڼل کیږي که نه؟
ایا د دوی لپاره د « اسلامی جمهوریه اف پاکستان» بمباري له انګریزي، شوروي یا امریکايي بمباریو سره برابره ګڼل کېدای شي؟
ایا دا بمباري به د دوی په ضمیر او ګډه حافظه کې هماغسې غوسه و قهرجن غبرګون راوپاروي، لکه د شوروي یا امریکايي بمبارونو پرضد چې د ملت په تاریخي حافظه کې ثبت شوې ده؟
د داسې تیري او اشغال په وړاندې ملي ولولې او ودرېدل خو ملي احساس او غرور غواړي، هغه څه چې د اوسنیو واکمنو له نظره له کفر سره معادل ګڼل کیږي. د اوسنیو واکمنو روحاني مشرانو ګڼ ځله د «ملي» کلمه او مفهوم تکفیر کړي دي.
پاکستان د تاریخي افغانستان خاوره لاندې کړې او یو لوی ملت یې په دوه ټوټو سره وېشلی دی، خو دغه تاریخي دوښمني یې د یوشمېر افراطي ډلو په ذهن و زړه کې د عقیدې په قلعي داسې پوښلې، چې د افغان ملتپالنې حس او ولولې یې ورلاندې خښې کړې دي.
په هرصورت، افغان ملت لا ژوندی دی. زخمي به وي. وسلې به یې پر پاکستان په کباړ کې پلورل شوې وي. د کباړ په بیه د سلګونو جنګي الوتکو نښې به یې د خپلو پوځي هوايي ډګرونو ترمخ د بري د نښې په توګه درولې وي، خو دا ملت لا ژوندی دی او خپله تاریخي حافظه لري. د افراطیت او ضد ملي تبلیغاتو د افیونو اغېز به ورو ورو لرې شي او افغانیت به سر راپورته کړي.
پاکستان ښه ونه کړل، د کابل په بمبار یې د یوه لوی ملت حافظه زخمي کړه. پاکستان به اتومي وسله لري، څوومه درجه پوځ به هم لري، ودان به هم وي، خو ملت نه لري. افغانستان ملت لري او دا ملتونه دي، چې تاریخونه جوړوي. دا تېری او دا تاریخي زخم دې نښه وي.
بلوڅ بيلتون پال وسله والو په یوه خبرپاڼه کې ویلي، چې د اکتوبر پر ۷مه یې د پاکستاني پوځ پر یو کمپ په برید کې ۱۴ پوځيان وژلي او ۴ نور يې سخت ټپيان کړي دي. د دغه ډلې ویاند میجر ګروم بلوچ زياتوي، د پوځ څخه یې په زيات شمېر وسلې او مهمات نيولي او د دوی یو سرتيري هم په کې وژل شوی دی.
د بلوڅ بیلتون غوښتونکو وسله والو ویاند د جمعه په ورځ په یوه خبرپاڼه کې ویلي په بالګتر د چين – پاکستان اقتصادي دهلیز پر لار د پاکستان پوځ پر يو پوځي کمپ د درنو او عصري وسلو برید کړي، چې شاوخوا درې ساعته یې دوام کړی.
ویاند زياته کړې، چې د برید وروسته یې پوځي مرکز نیولی او په کې ۱۴ پاکستاني پوځيان يې وژلي او ۴ نور يې زخميان کړي دي.
د نوموړي په خبر د عملیاتو پر مهال يې د پاکستان پوځ يو ډرون هم ویشتلی او را غورځولی دی.
بلوڅ بیلتون غوښتونکو ټينګار کړی، چې په سیمه کې به یې د پاکستان پوځ پر وړاندې خپل عملیات دوام ولري.