سرچینې افغانستان انټرنشنل ته ویلي، د طالبانو د بهرنیو چارو وزیر د ډيلي په سفارت کې له خبري ناستې وروسته له سفارت څخه د وتلو پر مهال د افغانستان ملي بیرغ د ودانۍ په دروازه کې ولید، نو هغه او د طالبانو د پلاوي غړو خپله لار بدله کړه، څو خبریالان له ملي بیرغ سره د دوی انځور وانخلي.
که څه هم د امیرخان متقي سفر لا هم پای ته نه دی رسېدلی، خو له ډېرو اړخیزو اغېزو سره مخ شوی دی.
له دې وړاندې د بامیان د بودا مجسمې سره د هغه د خبري غونډې انځور خپرېدل او د ښځينه خبریالانو له شتون پرته خبرې غونډې ترسره کېدل سخت غبرګونونه راپارولي وو.
سرچینو ویلي، چې په ډيلي کې د افغانستان په سفارت کې د امیرخان متقي د خبري ناستې په تالار کې د طالبانو بیرغ نه و، خو د طالبانو پلاوي له ځان سره د کابل نه خپل بیرغ وړی و او هغه یې له بکس نه را واېسته او د بهرنیو چارو وزیر مخې ته یې پر مېز کېښود.
یاد اقدام د ډیپلوماتیکو اصولو څخه سرغړونه ګڼل شوې ده.
هند ته د امیرخان متقي سفر پراخ غبرګونونه راپارولي دي.
له دې وړاندې د هند د اپوزیسیون مشر د دغه هېواد لومړی وزیر تورن کړ، چې د طالبانو پر وړاندې یې د هندي ښځو ملاتړ نه دی کړی.
