له کندهار او هلمند څخه بېلابېلو سرچینو افغانستان انټرنشنل ـ پښتو ته ویلي، چې طالب قاضیان د دې ډلې د مشر هبت الله په هغو فرمانونو کې فساد کوي، چې له مخې یې بندیان باید خوشې او یايي هم د بند موده کمه شي.
سرچینې وايي، د کندهار د محکمې قاضیان پر افغانستان د طالبانو د واکمنېدو د څلورمې کلیزې په مناسبت د هبت الله په ځانګړې فرمان کې د بندیانو د خوشې کولو او د بند مودې کمېدو له نوملړ څخه د مستحقو کسانو نومونه لرې کوي.
دغه سرچینې ادعا کوي چې قاضیان د مستحقو کسانو پر ځای په نوملړ کې د هغو کسانو نوم اضافه کوي، چې طالبانو سره اړیکې ولري او یا یې هم له وړاندې قاضیانو ته پیسې ورکړي وي.
د کندهار یوه اوسېدونکي د نوم نه اخېستلو په شرط افغانستان انټرنشنل ته وویل:«زما ورور په یوې جنايي قضیه کې د تېر یو کال راهیسې بندې دی، د هغه د بند موده تر راتلوونکو څو میاشتو پای ته رسیږي او هغه مستحق دی، چې د هبت الله په فرمان کې ځای شي، خو قاضیانو د هغه نوم له لېست څخه لرې کړی دی او قاضیانو ته نږدې کسان د هغه د نوم شاملولو لپاره پیسې غواړي.»
پر همدغه مهال په کندهار کې د طالبانو د محکمې یو کارکوونکي د نوم نه ښودلو په شرط وویل، چې د هبت الله له خوا د بندیانو د خوشې کېدو او د بند مودي کمېدو فرمان تر اوسه کندهار کې ځکه نه دی عملي شوی، چې په فرمان کې د یو شمېر هغو کسانو نومونه شامل شوي، چې له قاضیانو او یا هم لوړ پوړو طالبانو سره ښې اړیکې لري.
دغه طالب سرچینې افغانستان انټرنشنل ته وویل:«فرمان کې تر ډېره هغه بندیان شامل دي، چې د بند موده یې کمه پاتې وي او یا هم ډېره درنه دوسیه ونه لري، خو اوس ځینو کسانو د خپلو شخصي اړیکو له امله په دغه فرمان کې د غیر مستحقو کسانو نومونه شامل کړي دي، نو ځکه تر اوسه په کندهار کې د بندیانو د خوشې کېدو مسله همداسې پاتې ده.»
پر همدغه مهال د هلمند ولایت څخه هم ځینو سرچینو افغانستان انټرنشنل ته ویلي، چې د هبت الله په فرمان کې تر ډېره هغه کسان له زندانه خوشې او د یو شمېر د بند موده کمه شوه، چې له قاضیانو او نورو طالب چارواکو سره یې اړیکي لرلي.
د لښکرګاه ښار یو اوسیدونکي د نوم نه ښودلو په شرط وویل:« زما ورور د قرض په یو قضیه کې بندې دی. دوه کاله او شپږ میاشتې قید ورکول شوی. اوس یې څلور میاشتې قید پاتې دی، ما محکمې ته عریضه وکړه هغوی ویل خوشې کوو يي، خو زما ورور خوشې نه شو، خو ډېر کسان د قاضیانو او د محبس د مدیر په خوښه خوشې شول.»
دا په داسې حال کې ده، چې په وروستیو څو ورځو کې په هرات، فراه، هلمند او ځینو نورو ولایتونو کې د هبت الله د ځانګړي فرمان له مخې لسګونه کسان له زندانه خوشې او د ځینو کسانو د بند موده کمه شوې ده.
