سرچینې: د پاکستان پوځ له پي‌ټې‌اېم او نورو ګوندونو غوښتې چې پښتونخوا د پاکستان برخه وبولي

د پاکستان د پوځ د رسنیو څانګې د یکشنبې په ورځ اعلان وکړ، چې د پاکستاني جنګیالیو دوې ډلې یې کورمې ولسوالۍ او شمالي وزیرستان ته د داخلېدو پرمهال په نښه کړې او ۲۵ جنګیالي یې وژلي دي.

پاکستاني پوځ په دې جګړه کې د خپلو پنځو تنو سرتېرو وژل کېدل هم تایید کړي دي.

د پاکستان پوځ په خپله اعلامیه کې ویلي، چې لس جنګیالي په کورمه ولسوالۍ کې وژل شوي دي.

پاکستاني طالبانو تراوسه د پاکستان د پوځ د دې ادعا په اړه غبرګون نه دی ښودلی.

د پاکستان د پوځ په وینا، د جنګیالیو دغه نفوذي هڅې داسې وخت کېږي چې د پاکستان او افغانستان پلاوي په ترکیه کې په مذاکراتو بوخت دي او « دا چلند د افغانستان د موقت حکومت د ریښتینې ارادې په اړه شکونه راپاروي».

په اعلامیه کې ویل شوي، چې پاکستان تل له افغان موقت حکومت نه غوښتي چې پر خپلې خوا د پولې د اغېزناک مدیریت ډاډ ورکړي او د دوحې تړون د مکلفیتونو له مخې جنګیالیو ته پر پاکستان د برید اجازه ور نه کړي.

افغان طالبانو وخت ناوخته د پاکستان د پوځ ادعاوې رد کړې دي او وايي، د پاکستاني طالبانو موضوع د پاکستان کورنۍ مساله ده.

د پاکستان پوځ د شنبې په ورځ (د لړم ۳مه) د یوې خبرپاڼې په خپرولو سره ویلي، په دې عملیاتو کې د ټي‌ټي‌پي یو شمېر وسلې او مهمات هم ترلاسه شوي او په وینا یې دغه عملیات همداراز دوام لري.

د پاکستان پوځ په یوې بلې خبرپاڼه کې ویلي، د جمعې په ورځ یې په شمالي وزیرستان کې د یوه موټر بم برید طرحه شنډه او په ترڅ کې یې ۳ وسله وال هم وژلي دي.

په خبرپاڼه کې دغه کسان «د هند له ملاتړه برخمن خوارج» بلل شوي دي. د یادولو ده، چې د پاکستان حکومت ټي‌ټي‌پي «خوارج بولي.»

تر دې مخکې د پاکستان امنیتي ځواکونو د جمعې په ورځ ویلي و، چې د خېبرپښتونخوا په هنګو سیمه کې په یوې چاودنه کې د یوه لوړ پوړي افسر په ګډون ۳ پولیس وژل شوي او ۳ نور یې ټپيان شوي دي.

دغه عملیات په داسې حال کې دي، چې د خېبرپښتونخوا چارواکو چې د تحریک انصاف غړي دي په دغه ایالت کې د پوځ د عملیاتو د درېدو غوښتنه کړې او ویلي یې دي، چې په دې سره ترهګري کمېږي نه، بلکې پراخېږي.

ټي‌ټي‌پي لا تر اوسه په دې تړاو څه نه دي ویلي.

د پولیسو د چارواکو په وینا، تر دې پېښې وړاندې وسله‌والو د هنګو په غلمینه سیمه کې د پولیسو یوه امنیتي پوسته الوځولې وه، خو چاته پکې زیان نه وو اوښتی.

د پولیسو د معلوماتو له مخې، د لومړۍ چاودنې تر رامنځته کېدو وروسته، د پولیسو د عملیاتو مشر اسد زبیر له خپلو سرتېرو سره د پېښې ځای ته روان و، چې د درابن په سیمه کې یې په موټر چاودنه وشوه.

د سیمه‌ییزو چارواکو په وینا، په دې برید کې اسد زبیر او دوه پولیس سرتېري ځای پر ځای ووژل شول او دوه نور ټپیان شول.

د پاکستان د کورنیو چارو وزیر محسن نقوي د دې برید غندنه کړې او ویلي یې دي «د اسد زبیر او د هغه د ملګرو قرباني به هېڅکله نه هېرېږي او بې‌پایلې به نه وي.»

د خیبر پښتونخوا والي فیصل کریم کنډي په پېښور کې د سرحد خونې مشر سید جواد حسین کاظمي په مشرۍ د سوداګرو له پلاوي سره د افغانستان او پاکستان د تجارتي لارو د پرانېستل کېدو په اړه لیدلي دي.

سوداګرو په دې ناسته کې ټینګار کړی، چې د سرحدي لارو بندېدو د خېبر پښتونخوا د صنعت، کرنې او ترانسپورټ سکتورونه فلج کړي او زرګونه کسان وزګار شوي دي.

د سوداګرو د پلاوي مشر سید جواد حسین کاظمي وویل: «موږ هره ورځ میلیونونه روپۍ زیان وینو، ځکه د توکو لېږد درېدلی او د دواړو هېوادونو بازارونه د تړلي تجارت قرباني شوي دي، د لارو پرانیستل به نه یوازې اقتصاد ته ګټه ورسوي، بلکې د دواړو غاړو اعتماد به هم بېرته راژوندی کړي.»

والي فيصل کریم کنډي سوداګرو ته ډاډ ورکړی، چې د دوی غږ به اسلام‌اباد ته ورسوي او له فدرالي چارواکو سره به د تجارتي تګ‌ راتګ د بیا پیل لپاره خبرې وکړي.

هغه وویل: «د خېبر پښتونخوا امنيت او اقتصاد يو له بله نه بېلېږي، موږ دواړه يوځای پياوړي کول غواړو.»

له بلې خوا، د فاټا د لویې جرګې همغږي کوونکي فضل کریم اپريدي د پېښور په پرېس کلب کې له حکومت نه غوښتنه کړې، چې د تورخم او نورو تجاراتي لارو د پرانیستلو لپاره بېړني اقدامات وکړي.

ده ویلي، سره له دې چې د طالبانو او پاکستاني ځواکونو ترمنځ اوربند شوی، خو د لارو تړلي پاتې کېدل له خلکو سره زیاتی دی.

هغه زیاته کړې، چې زرګونه کسان په دواړو خواوو کې بند پاتې دي، چې ناروغان، کارګر او سوداګر پکې شامل دي، او د انساني همدردۍ اصول سخت زیانمن شوي دي.

په وروستیو کې د طالبانو او د پاکستاني ځواکونو ترمنځ نښتو د دواړو هېوادونو ترمنځ تجارتي تګ‌ راتګ سخت اغېزمن کړی، چې له کبله یې پاکستان د تورخم، چمن او یو شمېر نورو دروازو تړلو پرېکړه کړې.

سوداګر وايي، چې د لارو تړل کېدو له امله هره ورځ یو میلیون ډالره زیان ویني.

د خیبر پښتونخوا ایالت د شمالي وزیرستان ولسوالۍ امنیه قوماندان تایید کړې چې پېښه په میرعلي سیمه کې شوې او وسله والو پر موټر په ډزو کې شپږ کسان وژلي دي.

د ده په وینا، له برید وروسته موټر اور واخیست او بریدګر له سیمې تښتېدلي دي.

پولیس وایي، د وژل شویو کسانو مړي د پېژندنې لپاره د میرعلي روغتون ته انتقال شوي دي.

خو تر اوسه د دغه برید مسوولیت چا نه‌دی منلی.

دغه برید په داسې حال کې شوی، چې په وروستیو میاشتو کې په شمالي وزیرستان او شاوخوا سیمو کې د وسله والو بریدونه زیات شوي او سیمه یې نا امنه کړې ده.