په پنجشېر کې د طالبانو امنیه قومندانۍ په دوو جلا خبرپاڼو کې ویلي، چې په پریان ولسوالۍ کې یې ۱۴۷ کیلوګرامه تاریاک کشف او ضبط کړي دي. طالبانو زیاته کړې، چې په خنج ولسوالۍ کې د تالاشي پر مهال یې درې میله کلاشنیکوف او مهمات له یوه کس سره نیولي دي.
په پنجشېر کې د طالبانو امنیه قومندانۍ د شنبې په ورځ (د لړم ۱۷مه) ویلي، چې په پریان ولسوالۍ کې یې د پټو معلوماتو پر اساس یو سراچه ډوله موټر نیولی، چې ۱۴۷ کیلو ګرامه تاریاک په کې ځای پر ځای شوي وه.
طالبانو ویلي، چې په دې تړاو یې هغه دوه کسان هم نیولي دي چې غوښتل یې دغه مواد له پنجشېر څخه کابل ته انتقال کړي.
د دې ولایت د طالبانو امنیتي مسوولینو په یوې جلا خبرپاڼه کې ویلي، چې د خنج ولسوالۍ د دواب په سیمه کې یې د تالاشي پر مهال له یوه کس سره درې میله کلاشنیکوف، څلور عدده شاجور مرمی، یو دوربین او یوه مخابره نیولي دي.
طالبانو ویلي، چې دغه کس غوښتل وسلې د خنج ولسوالۍ څخه دره ولسوالۍ ته ولېږدوي.
طالبانو په خبرپاڼه کې ویلي، چې نیول شوي کسان یې عدلي او قضايي ارګانونو ته سپارلي دي.
