د ملګرو ملتونو پراختيايي پروګرام(یو این ډي پي)په يو تازه راپور کې ویلي چې د افغانستان اقتصادي وضعیت د سقوط په درشل کې دی او له هر لسو افغان کورنيو څخه ۹ هغه د بد اقتصادي وضعیت له امله کم خواړه خوري او د ژوند د بقا لپاره خپلې شتمنۍ پلوري او يا هم پوروړي شوي دي.
په راپور کې راغلي چې د کډوالو د راستنېدو پراخ بهیر د هېواد اوسنی اقتصادي بحران لا پسې ژور کړی دی.
د ملګرو ملتونو د احصایو له مخې، نږدې لس سلنه هغه افغانان چې له هېواده بهر مېشت وو، اړ شوي چې بېرته خپل هېواد ته راستانه شي.
له ۲۰۲۳کال راوروسته تر اوسه پورې شاوخوا ۴،۵ ميليونه کسان چې ډېری یې په ايران او پاکستان کې کډوال وو، بېرته افغانستان ته راستانه شوي دي. ددغه شمېر د افغانستان نفوس شاوخوا ۱۰سلنه زيات کړی دی.
راپور زياتوي چې طبيعي پېښو لکه زلزلې، سېلابونو او وچکالۍ هم د خلکو ژوند ته سخت تاوان اړولی، او نږدې اته زره کورونه يې ويجاړ کړي دي، چې له امله یې د عامه خدمتونو (روغتيا، تعليم، سرپناه او مرستو) سيستمونه له خپلې عادي وړتيا څخه تر ډېر فشار لاندې راوستي دي.
یاده اداره خبرداری ورکوي چې که د افغانستان د اقتصاد ملاتړ ونهشي او د بېځايه شويو او راستنېدونکو کسانو لپاره د کار او عايد فرصتونه برابر نهشي، نو په دغه هېواد کې به د لوږې او بېوزلۍ کچه نوره هم لوړه شي.
