هر کال د نوامبر ۳مه یکشنبه د هغو کسانو په یاد نمانځل کېږي، چې د ترافیکي پېښو له امله مړه کېږي. د ترافیکي پېښو له امله په نړۍ کې هره دقیقه دوه کسان مړه کېږي او دا له ۵ تر ۲۹ کلونو د ځوانانو لپاره د مړینې لومړنی لامل ګڼل کېږي. سږ کال دغه ورځ نن یکشنبه د نومبر پر ۱۶مه نمانځل کېږي.
دغه نړۍواله ورځ د ۱۹۹۳ کال راهیسې د «روډ پیس» سازمان له خوا پیل شوې او په ۲۰۰۵ کال کې ملګرو ملتونو د نړۍ په کچه رسمي ونمانځله. د دغې ورځې د نمانځلو موخه د سړکونو د خوندي ساتلو اقداماتو ته وده ورکول او د قربانیانو حقونو ته درناوی ښودل شوی.
د روغتیا نړۍوال سازمان راپور ښيي، چې هر کال ۱.۳۵ میلیونه کسان د ترافیکي پېښو له امله ژوند له لاسه ورکوي. د قربانیانو ډېره برخه د پليتګ کوونکو، بایسکل او موټرسایکل چلوونکو په منځ کې ده، په ځانګړي ډول په پرمختلليو هېوادونو کې.
افغانستان هم د غرني جوړښت او اقلیم له امله د ډېرو ترافیکي پېښو شاهد دی. د سړکونو نا مناسب وضعیت، د ترافیکي قوانینو نه پلي کول، د ترافیکي نښو نښانو نشتوالی او د موټر چلوونکو بې احتیاطي هغه نور عوامل دي، چې هر کال د سلګونو افغانانو ژوند اخلي.
ځینې لارې چې په ځانګړي ډول د پېښو له امله خطرناک ګڼل کېږي: د سالنګ لویه لار، ماهیپر، د پکتیا-لوګر تېرې کوتل، د کابل-کندهار لویه لار او د هرات حلقوي سړک دی.
د یادونې ده، چې روان کال د اګسټ په ۱۹مه د اسلام کلا – هرات په لاره خونړۍ ترافیکي پېښه وشوه، چې له امله یې لږ ترلږه ۷۹ کسان مړه شول.له دې پېښې څو ورځې وروسته د اګسټ په ۲۶ مه د کابل – کندهار په لویه لار د ارغندې په سیمه کې د مساپر وړونکي بس موټر د چپه کېدو په پېښه کې ۲۵ کسان مړه او ۲۷ نور ټپیان شول.
