نیویارک ټایمز د امریکا د کورني امنیت وزارت د اسنادو له مخې راپور ورکړی، چې دغه هېواد د کډوالۍ په پالیسۍ کې د بدلون پلان لري، ترڅو له مخې به یې د پناه غوښتونکو لپاره د شنه کارټونو ترلاسه کول نور هم ستونزمن شي.
افغانان او د یوولسو نورو هغو هېوادونو وګړي چې د ټرمپ د سفر له بندیز سره مخ دي، له دغه بدلون څخه اغېزمن شي.
د نیویارک ټایمز له خوا د ترلاسه شویو اسنادو له مخې، د دغه وګړو لپاره به د شنه کارټونو او نورو اسنادو صادرول محدود وي.
د دغه پالیسۍ د بدلون موخه د امریکا حکومت له خوا په هغو هېوادونه فشار راوړل دي، چې د ټړمپ په ګومان د کډوالو د شالیدونو د پلټنې او ارزونې لپاره کافي میکانیزمونه نه لري.
رسمي اسناد ښیي، چې د متحده ایالاتو د تابعیت او کډوالۍ خدمتونه د «هېواد پورې اړوندو عواملو» پراساس د پناه غوښتنې غوښتنلیکونو په پام کې نیولو سره د دغه هېوادونو تابعیت لرل یو «منفي ټکی» ګڼي.
د راپورونو له مخې، دغه بدلونونه لا تر اوسه نه دي پلي شوي خو کېدای شي ډېر ژر پلي شي.
د ټرمپ د سفر بندیز د افغانستان، چاد، د کانګو جمهوریت، استوایی ګیني، اریتره، هایتي، ایران، لیبیا، میانمار، سومالیا، او د سوډان هېوادونو د وګړو لپاره دي.
دا حکم د دې هېوادونو د ځینو وګړو لپاره استثناوې لري. هغه افغانان چې د کډوالۍ ځانګړي ویزې (اېس ای وي) پروګرام لپاره وړ دي او د افغانستان د جګړې پرمهال یې د متحده ایالتونو له حکومت سره مرسته کړې، له دغه بندیز څخه وتلي دي.
همدارنګه د دې بندیز څخه د شنه کارټ لرونکي، ورزشکاران چې د ۲۰۲۶ نړۍوال جام یا په لاس انجلس کې د ۲۰۲۸ د دوبي المپیک لپاره متحده ایالتونو ته سفر کوي، له دغه امر څخه استثنا دي.
د افغانانو د بیا ځای پرځای کولو د ملاتړ ادارې (افغان اېواک) مشر شاون وانډایور لیکلي: «د نوې پالیسۍ له مخې، هغه افغانان چې د پناه غوښتنې غوښتنلیکونه یې دمخه بیا کتل شوي او منل شوي دي، کېدای شي د دوی د تابعیت له امله یې شنه کارټونه رد شي. »
هغه یادونه وکړه، چې دا پلان لا تر اوسه د امریکا د حکومت رسمي پالیسي نه ده ګرځېدلې، خو که چیرې د هغې پر وړاندې کوم اعتراض یا مقاومت ونشي، نو دا به قانون شي.
د افغانانو لپاره د ملاتړي دغې ادارې مشر ټینګار وکړ، چې که دا پالیسي رسمي شي، نو د زرګونو هغو افغانانو د تګ لاره به وتړل شي، چې د امریکا ژمنو ته هیله مند دي.
