پخواني ولسمشر حامد کرزي د نومبر ۲۰مې د ماشومانو نړۍوالې ورځې په مناسبت یوې اعلامیه کې ټینګار کړی، چې د هېواد د ماشومانو وضعیت ته باید جدي پاملرنه وشي. هغه ویلي، چې په ټول هېواد کې باید د نجونو پرمخ د ښوونځیو او پوهنځیو دروازې بېرته پرانېستل شي.
پنجشنبه د (لړم ۲۸مه) کرزي ويلي، ماشومان د ټولنې د راتلونکي جوړوونکي دي او له ټولو ډېرې پاملرنې او رزونې ته اړتیا لري. هغه زیاته کړې، ماشومان هغه مهال روښانه راتلونکی لرلای او د هېواد په ابادۍ او پرمختګ کې ونډه اخیستلای شي چې د ننني عصر له مخې د زدهکړو حق، د پوهې تر لاسه کولو زمینه او اړین مهارتونه ورسره وي.
پخواني ولسمشر ټینګار کړی، چې زدهکړه د هر ماشوم بنسټيز حق دی او د ټولنې لپاره یوه ژوندۍ اړتیا ګڼل کېږي. د هغه په باور؛ د افغانستان پرمختګ او سوکالي هغه وخت شونې ده، چې د نن ورځې ماشومان د سبا لپاره د مسلکي او روزل شویو بشري ځواکونو په توګه وروزل شي.
د کرزي د اعلامیې په یوې برخه کې راغلي: «له همدې امله اړینه ده، چې د هېواد د ټولو اولادونو، نجونو او هلکانو پر وړاندې د ښوونځيو او پوهنتونونو دروازې هر څه ژر خلاصې شي؛ څو په عامه توګه د زدهکړو د برابرېدو له لارې د هېواد د پرمختګ او غوړېدنې لاره هواره شي».
د افغانستان پخواني ولسمشر تر دې دمخه هم څو، څو ځله له طالبانو غوښتي و، چې د نجونو پر مخ له شپږم ټولګي پورته د ښوونځیو زدهکړې بېرته پیل کړي. د هغه یوه لور ملالې کرزۍ هم څو میاشتې وړاندې په کابل کې شپږم ټولګی بشپړ کړ او اوس په کور دننه د طالبانو د بندیز له مخې په ښوونځي کې تر دې پورته د زدهکړو حق نهلري.
طالبانو د خپل دویم ځلې واکمنۍ له پیل راهیسې هم د لومړۍ دورې په څېر د نجونو پر زدهکړو او د ښځو پر کار سخت بندیزونه او محدودیتونه لګولي دي. دغه ډله د همدې سختدریځه تګلارو له کبله په نړۍواله کچه سخته منزوي شوې او پرې سخت فشارونه هم راول شوي؛ خو د نجونو د زدهکړو په تړاو د ملاهبت الله په افراطي دریځ کې لا څه بدلون نهدی راغلی.
