اورشلیمپوسټ په یوې تازه شننه کې لیکلي، چې د عراق او سوریې په پوله د امنیتي دېوال جوړول چې تراوسه یې نیمایي کار بشپړ شوی، کولی شي د ایران تر ملاتړ ډلو د ناقانونه نفوذ مخه ونیسي او د تهران سیمهییز نفوذ پروژې ته زیان ورسوي.
د دغې شننې له مخې، بغداد له ۲۰۱۴ کال راهیسې د هغو وسلهوالو ډلو او د داعش د پاتې شونو له نفوذ څخه اندېښمن دی، چې د سوریې له پولو پرته عراق ته ننوتي دي؛ له همدې امله د دېوال د جوړولو پروژه په ۲۰۲۲ کال کې پیل شوه.
عراق تر دې دمه د ۳۵۰ کیلومټره دېوال کار بشپړ کړی او په وروستیو اوونیو کې یې کار نور هم چټک شوی.
شننه زیاتوي، چې له صدام حسین وروسته د عراق سیاسي وضعیت بدل شوی او دغه هېواد لا هم د هغو کسانو تر واک لاندې دی، چې ایران ته نږدې ګڼل کېږي؛ خو سوریه اوس د یوه سني ډلې تر واک لاندې ده، چې د ایران سره مخالفه ده. دغه بدلون د ایران د نفوذ معادله او د دواړو هېوادونو د پولو امنیتي وضعیت لا پېچلی کړی دی.
د عراقي رسنۍ «نورپرس» د معلوماتو له مخې، دغه دېوال د درې مترو په پلنوالي او ژوروالي، څلور پوړیز دېوال، د یو کیلومتر په واټن برجونه او د څارنې پر کمرو مجهز سیسټم لري.
د راپور له مخې، په راتلونکي کې به دا دېوال د یوې ګډې دفاعي شبکې له لارې د ۲۴ساعته خبرداري سیسټم سره هم ونښلول شي.
اورشلیمپوسټ لیکلي، چې دا پروژه د یوې پراخې پروسې برخه ده چې په هغې کې د سوریې ګاونډیان هم د امنیتي موانعو د جوړولو پر لور تللي، ترڅو د سیمې د نفوذي لوبغاړو په ځانګړي ډول د ایران فعالیتونه محدود کړي.
