د خارکیف والي اولیه سینیهوبوف د یکشنبې په ورځ خبر ورکړ، چې روسي ځواکونو د اوکراین پر خارکیف ښار د ډرون بریدونه کړي چې له امله یې څلور کسان وژل شوي او د دوو ماشومانو په ګډون ۱۲ نور ټپیان دي.
د راپورونو له مخې؛ د دغه ښار په شپږو بېلابېلو سیمو ۱۵بریدونه شوي دي.
د رویټرز د راپور له مخې، درېیو اروپایي قدرتونو چې د E3 په نوم یادېږي او پکې برېتانیا، جرمني او فرانسه شامل دي، د اوکراین د سولې د ۲۸ مادو پر طرحې امریکا ته یو متقابل وړاندیز ورکړی.
رویټرز لیکلي، چې نن یکشنبه د لیندۍ پر ۲مه یې دغه سند لیدلی. دغې طرحې د امریکا له خوا د وړاندیز شويو محدودیتونو هغه برخه چې د اوکراین پوځي ځواکونو شمېر دې کم شي بدل کړی او د کییف د ځمکنیو امتیازونو پورې اړوندې برخې یې لرې کړې دي.
دغه سند چې د جینوا د خبرو اترو لپاره چمتو شوی وړاندیز کوي، چې د سولې پر مهال دې د اوکراین پوځي ځواکونه ۸۰۰ زرو پورې محدود شي، نه ۶۰۰زره چې امریکا وړاندیز کړی.
د امریکا په طرحه کې د کریمیا، ډونیټسک او لوهانسک سیمو بشپړتیا په څرګنده توګه په رسمیت پېژندل شوې وه، خو په نوي اروپايي وړاندیز کې د روسیې د کنټرول په رسمیت پېژندلو پورې اړوندې ټولې مادې لرې شوې دي.
په اروپایي طرحه کې د هر ډول ځمکنیو تبادلو له ټاکل کېدو مخکې د اوربند غوښتنه شوې او دا په ګوته شوې، چې اوسنۍ لومړۍ کرښه باید د راتلونکو خبرو اترو اساس وي.
اروپایانو د امریکایي طرحې پر خلاف په اوکراین کې د ټاکنو د ترسره کولو لپاره د ۱۰۰ ورځو ضرب الاجل لرې کړی او پرځای یې لیکلي، چې ټاکنې باید "د سولې تړون له لاسلیک وروسته ژر تر ژره" ترسره شي.
د هند حکومت ویلي، چې له کاناډا سره یې هوکړه کړې ترڅو د نوې سوداګریزې هوکړې خبرې بیا پیل کړي. دا خبرې له دوو کلونو راهیسې د دواړو هېوادونو ترمنځ له ډېپلوماټیکو شخړو وروسته ځنډیدلې وې.
د کاناډا لومړي وزیر مارک کارني د یکشنبې په ورځ د سوېلي افریقا په جوهانسبورګ کې د جي-۲۰سرمشریزې څنډه کې د هند له لومړي وزیر نرېندرا مودي سره کتلي.
د هند دلومړي وزیر د دفتر په وینا: «دواړو مشرانو د لوړې کچې ټولګډونه اقتصادي مشارکت تړون(CEPA) پر مذاکراتو د پیل موافقه وکړه، چې موخه یې تر ۲۰۳۰کال پورې دوه اړخیز تجارت ۵۰میلیارده ډالرو ته رسوي.»
مارک کارني پر اېکسپاڼه لیکلي: «ما او نرېندرا مودي نن په جي-۲۰ سرمشریزه کې سره ولیدل او د سوداګرۍ د هوکړې خبرې مو پیل کړې چې له مخې یې زموږ دوه اړخیز تجارت تر ۷۰میلیارده کاناډايي ډالرو زیاتېدلی شي. هند د نړۍ پنځم لوی اقتصاد دی، چې دا زموږ د کاناډايي کارګرانو او سوداګرو لپاره ستر فرصتونه برابرولای شي.»
هغه زیاته کړه، چې دواړو هېوادونو د سولر انرژۍ او اټومي ملکي انرژۍ په برخه کې د اوږدمهاله همکارۍ هوکړه هم کړې او د یورانیمو د اوږدمهاله قراردادونو په اړه خبرې روانې دي.
دغه پرمختګ څرګندوي، چې د دواړو هېوادونو اړیکې د ښه کېدو په لور روانې دي، په داسې حال کې چې کارني هڅه کوي، د کاناډا سوداګریزې اړیکې د امریکا څخه هاخوا پراخې کړي کوم چې د کاناډا تر ټولو لوی سوداګریز شریک دی.
کاناډا په ۲۰۲۳کال کې د پراخې سوداګریزې هوکړې خبرې وروسته له هغې ودرولې، چې د کاناډا حکومت د هند حکومت د یوه کاناډايي سیک بېلتونپال د وژنې په قضیه کې په لاس لرلو تورن کړ، خو د هند حکومت دا تور رد کړی دی.
واشنګټن پوسټ لیکلي، چې د سویس ساینسپوهانو یو داسې مایکرو روباټ جوړ کړی، چې اندازه یې د شګې د دانې سره برابره ده او د مقناطیسي ساحې په وسیله کنټرولېږي.
د راپور له مخې، دغه کوچنی روباټ کولی شي د وینې رګونو او یا د دماغي مایعاتو له لارې حرکت وکړي او درمل د بدن دقیقې برخې ته ورسوي.
ورځپاڼې لیکلي، چې دا پرمختګ د دې لپاره طرحه شوی چې د درملو سخت جانبي عوارض کم کړي.
د واشنګټن پوسټ په وینا، ساینسپوهان باور لري چې دا مایکرو روباټ کولای شي د ځانګرو درملنو لپاره په طبابت کې نوی بدلون رامنځته کړي.
رویټرز د یکشنبې په ورځ (د لیندۍ دویمه) د دوو باخبره سرچینو له قوله لیکلي، چې امریکایي او اوکرایني چارواکي امریکا ته د زېلېنسکي د احتمالي سفر په اړه په خبرو بوخت دي او ښایي ولادیمیر زېلېنسکي روانه اوونۍ واشنګټن ته سفر وکړي.
سرچینو ویلي، چې د دې لیدنې موخه د زېلېنسکي او د امریکا د ولسمشر ډونالد ټرمپ ترمنځ د «سولې طرحې» په اړه مستقیمې خبرې دي.
یوې سرچینې رویټرز ته ویلي، اصلي موضوع دا ده چې ټرمپ او زېلېنسکي د امریکا د طرحې تر ټولو حساسو مسئلو په ځانګړي ډول د خاورې د موضوع په اړه به بحث وکړي.
د سرچینې په وینا، د دې سفر کره نېټه لا تر اوسه نه ده ټاکل شوې.
همداراز نن یکشنبه (د لیندۍ دویمه) ولادیمیر زېلېنسکي د ډونالډ ټرمپ له هغو هڅو مننه کړې، چې د کییف په ملاتړ یې ترسره کړې دي.
زېلېنسکي ویلي: «اوکراین د متحده ایالاتو، هر بل امریکایي او په ځانګړې توګه د ولسمشر ټرمپ څخه منندوی دی، د هغه له مرستې چې د جاولین توغندیو په وړاندې پیل شوې او د اوکرایني وګړو ژوند ژغوري.»
د زېلېنسکي دا څرګندونې وروسته له هغې خپرې شوې، چې ټرمپ ویلي وو اوکرایني مشران د امریکا له مرستو «هېڅ ډول مننه» نه کوي.
د طالبانو تر واک لاندې افغاني سرې میاشتې ویلي، چې د سمنګان ولایت د خُلم ولسوالۍ په بېلابېلو سیمو کې یې له ۴۰۰ زلزلهځپلو کورنیو سره د لومړنیو اړتیاوو د پوره کولو او د بېوزلۍ د کمولو په موخه د ۳۱.۲ ټنه خوراکي توکي وېشلي دي.
طالبانو ویلي، چې دغه مرسته د ملک سلمان د بشري مرستو د مرکز له لوري چمتو شوې وه او پر هرې کورنۍ ۷۸ کیلو ګرامه خوراکي توکي وېشل شوي دي.
په دې مرستو کې اوړه، غوړي، وریجې، بوره، لوبیا او خرما شامله ده.
د یادولو ده، چې څه موده وړاندې سمنګان، بلخ او ځینې نور ولایتونه نسبتا زوروري زلزلې ولړزول.
د روغتیا نړۍوال سازمان په خپل وروستي راپور کې ویلي، چې د افغانستان په شمال کې د زلزلې له امله لږ تر لږه ۲۶کسان مړه او ۱،۱۴۴ تنه نور ټپیان شوي دي.
یاد سازمان زیاتوي، په زلزلهځپلو سیمو کې شاوخوا ۴۳۰ کورونه هم ویجاړ شوي دي.