پاکستاني پولیسو په اسلاماباد کې د صابر شېرزاد په نوم د نورین ټلوېزیون پخوانی خبریال نیولی دی. نیول شوي خبریال ته نږدې کسانو له افغانستان انټرنشنل-پښتو سره په اړیکه کې ویلي، چې نوموړی د اسلاماباد له اېف-۶ سیمې څخه نیول شوی او پولیسو حاجي کمپ ته لېږدولی دی.
دوی د خبریالانو پر ملاتړو سازمانونو او نړۍوالې ټولنې غږ کړی، چې د نیول شویو افغان خبریالانو د اېستل کېدو مخه ونیسي.
یاد خبریال په داسې حال کې نیول شوی، چې پاکستاني پولیسو تېره ورځ په اسلاماباد کې یو بل افغان خبریال نورالله اکبري هم نیولی او د شړلو لپاره یې حاجي کمپ ته استولی دی.
د یادولو ده، چې د پاکستان پولیسو په نیمه شپه شاوخوا ۱ بجه (دوشنبه د لیندۍ ۳مه) د اسلاماباد په ارجنتینا پارک کې پر مېشتو افغان کډوالو چاپه ووهله او سلګونه کسان یې ونیول. افغانستان انټرنشنل-پښتو ته په رارسېدلو ویډيوګانو کې لیدل کېږي، چې د ښځو په ګډون ځينې کسان د پولیسو له لوري وهل ټکول شوي هم دي.
ویل کېږي، چې په نیول شویو کسانو کې ډېر شمېر خبریالان او د ښځو د حقونو فعالانې هم شاملې دي، خو کره شمېره یې تر اوسه روښانه نه ده.
