افغانستان انټرنشنل ته رسېدلي اسناد او ویډیوګانې ښيي، چې طالبانو د ننګرهار ولایت د جلالاباد ښار د اوومې ناحیې په چکنوري سیمه کې چې اوسمهال د «افغان مېنې» په نوم یادېږي؛ د بورې جوړولو دولتي فابریکه تخریب کړې ده.
د سیمې اوسېدونکي وایي، چې دغه فابریکه د شپې په تیاره کې نړول شوې او د فابریکې ماشینونه او وسایل ناڅرګند ځای ته انتقال شوي دي.
د اوسېدونکو د معلوماتو پر بنسټ؛ دغه فابریکه چې د وخت حکومت په لوړو لګښتونو او د متخصصینو د پلان له مخې په نهه جریبه ځمکه کې جوړه شوې وه، د بورې او قندو د تولید یوه ستره فابریکه بلل کېده.
که څه هم د ډاکټر نجیبالله د حکومت له پرځېدو وروسته د فابریکې دروازه تړلې وه؛ خو ماشینونه او وسایل یې په خپل ځای پاتې وو. د اسنادو له مخې؛ هماغه مهال د فابریکې د انجینیرانو او کارکوونکو لپاره شاوخوا ۱۵۰ فامیلي کورونه په همدې ساحه کې جوړ شوي وو.
یاد کارکوونکي تر اوسه په همدغه کورونو کې اوسېږي او هر کال به یې دوه مېلیونه افغانۍ د حقالاجارې په توګه د زراعت ریاست حساب ته د دولتي خزانې له لارې ورسپارلې؛ خو اوس دغه پیسې ۹۰۰زره افغانیو ته راټیټې شوې او د قرارداد له مخې شمس ترین شرکت ته سپارل کېږي.
اوسېدونکي وایي، چې له شمس ترین شرکت سره د قرارداد له لاسلیکېدو وروسته فابریکه تخریب شوې ده. هغوی ادعا کوي، چې په یاد قرارداد کې تر ۱۲۰زره ډالرو پورې بډې اخیستل شوې دي. د دوی په وینا؛ په ننګرهار کې د طالبانو مرستیال والي مولوي مصطفی، د یادې ډلې د کرنې ریاست د اجارې مدیر نواز شریف، د ښاروالۍ ساختماني رییس لیاقت، د استخباراتو د څېړنې څانګې غړی محسن او د استخباراتو د دفتر مدیر چې په ننګرهار کې د طالبانو د مخکېني د استخباراتو ریس ډاکټر بشیر له ډلې دی، په غیر مستقیم ډول په دغه قرارداد کې ښکېل دي.
