د طالبانو د بهرنیو چارو وزارت مالي او اداري مرستیال محمد نعیم د ایران د بهرنیو چارو وزارت له مالي او اداري مرستیال مهدي سبحاني سره په لیدنه کې د دوه اړخیزو اړیکو پر پیاوړتیا او په ایران کې مېشتو افغانانو ته د کونسلي خدمتونو پر ښه والي او پرمختګ خبرې کړې دي.
د طالبانو د بهرنیو چارو وزارت نن د چارشنبې په ورځ، د لیندۍ ۵مه د یوې خبرپاڼې په خپرولو سره د محمد نعیم له قوله لیکلي، چې طالبان له ګاونډیانو سره د متوازنو او متقابلو اړیکو پر پیاوړتیا باور لري او د هرې ستونزې د حل لپاره خبرو او تفاهم ته لومړیتوب ورکوي.
همدارنګه طالبانو ویلي، چې د ایران د بهرنیو چارو وزارت مالي او اداري مرستیال مهدي سبحاني د افغانستان ملي حاکمیت ته د درناوي ترڅنګ د دوه اړخیزو همکاریو پراختیا او د سیمې د سولې او ثبات پر ملاتړ ټینګار کړی دی.
