د ملي مقاومت جبهې ویلي، چې په پنجشیر ولایت کې یې تېره شپه په یوه هدفمند او پیچلي برید کې د طالبانو یو مهم مرکز په نښه کړی. یادې جبهې ویلي، چې په دې عملیاتو کې یې د طالبانو د ځانګړي کنډک د رییس په ګډون ۱۷ غړي وژلي او ۵ نور یې ټپیان کړي دي.
د طالبانو مخالفې وسله والې ډلې ملي مقاومت جبهې په یوه اعلامیه کې ویلي، چې دغه عملیات د لیندي پر۱۷مه ماښام شاوخوا شپږ بجې په دوو پړاوونو کې ترسره شول.
د یادې جبهې په وینا، لومړی ځای پر ځای شوي ماینونه وچاودول شول او وروسته راکټي بریدونه وشول چې طالبانو ته یې درنده مرګ ژوبله اړولې ده.
یادې جبهې ویلي، چې د طالبانو یاد مرکز د پنجشیر ولایت د دره ولسوالۍ په منجستو کلي کې موقعیت درلود او د دې ډلې یو مهم ځای ګڼل کېده.
یادې جبهې ویلي، چې ددوی ځواکونو او ملکي خلکو ته مرګ ژوبله نه ده اوښتې.
طالبانو تراوسه ددغه برید په اړه هیڅ غبرګون نه دی ښودلی.
