د افغانستان د فوټبال فدراسیون اعلان کړی، چې د هېواد د فوټسال ملي لوبډله به د ۱۴۰۴کال د لېندۍ له ۱۷مې د مرغومې تر ۲مې نېټې پورې د پنځه ورځني روزنیز کمپ لپاره کویټ ته سفر وکړي.
د دغه روزنیز کمپ په لړ کې به افغان لوبغاړي د لېندۍ په ۲۹مه او د مرغومې په لومړۍ نېټه د کویټ فوټسال ملي لوبډلې پر وړاندې دوه د چمتووالي سیالۍ هم ترسره کړي. د فدراسیون په اعلامیه کې راغلي، چې د دغه لوبو لپاره به کره وخت ډېر ژر وټاکل شي او بیا به اعلان شي.
دغه فدراسیون ویلي، چې د یاد روزنیز کمپ او چمتووالي سیالیو د ترسره کولو موخه د ۲۰۲۶کال د اسیا فوټسال جام لپاره د افغان لوبغاړو لا چمتو کول دي.
د اسیا جام وروستی پړاو چې ۱۶ لوبډلې به پهکې ګډون وکړي، د ۱۴۰۴کال د سلواغې له ۷مې څخه تر ۱۸مې نېټې پورې (د ۲۰۲۶کال د جنورۍ له ۲۷مې څخه د فبرورۍ تر ۷مې نېټې پورې) په اندونیزیا کې ترسره شي.
په دغه سیالیو کې د افغانستان د فوټسال ملي لوبډله د ایران، سعودي عربستان او مالیزیا سره په څلورم ګروپ کې همډلې ده.
د سیالیو بشپړه ډلبندي:
• لومړۍ ډله: اندونیزیا، عراق، قرغزستان او سویلي کوریا
• دویمه ډله: ټایلنډ، ویتنام، کویټ او لبنان
• درېیمه ډله: جاپان، ازبکستان، تاجکستان او اسټرالیا
• څلورمه ډله: ایران، افغانستان، سعودي عربستان او مالیزیا
