د افغانستان د بهرنیو چارو پخواني وزیر محمد حنیف اتمر چې د سیاسي احزابو همغږۍ بهیر لوړ پوړی غړی دی، افغانستان انټرنشنل ته وویل چې امریکا به ژر یا وروسته د افغانستان مسالې ته را ستنیږي. اتمر وویل، چې طالبان باید د سیاسي خبرو اترو پروسه ومني.
اتمر د سې شنبې په ورځ افغانستان انټرنشنل ته په یوه مرکه کې وویل چې په افغانستان کې د ثبات لاره بین الافغاني خبرې اترې دي او له طالبانو یې وغوښتل چې دې کار ته غاړه کېږدي.
اتمر زیاته کړه :«د افغان سیاستوالو، د سیمې او نړۍ هیوادونو ترمنځ یو ګډ فکر رامینځته شوی، او دا اجماع په افغانستان کې د اندیښنو د نه زغملو ټینګار کوي.»
هغه وویل، چې طالبان باید دا اندېښنې حل کړي او د سیاسي خبرو اترو پروسه ومني.
اتمر وویل ، چې د هر نظام مشروعیت د تحمیل یا ازاد کنټرول له لارې نه ترلاسه کیږي، بلکې یوازې د خلکو د حقونو او ازادیو ضمانت کولو له لارې ترلاسه کیږي.
د نوموړي په وینا، د سیاسي احزابو همغږۍ بهیر اعلامیه د بشري حقونو، په ځانګړې توګه د ښځو حقونو او نورو بشري اړتیاوو ته پر درناوي ټینګار کوي او افغان سیاستوالو ژمنه وکړه چې د سیاسي اهدافو د ترلاسه کولو لپاره به په ګډه کار وکړي.
هغه وویل چې سیاسي انتخاب او د افغانانو ترمنځ خبرې اترې غوره دي او حتا هغه کسان چې وسله وال مقاومت یې نه دی رد کړی، په خبرو اترو باور لري.
له اتمر څخه په مرکه کې وپوښتل شول چې ایا د مقاومت جبهې مبارزه به د خبرو اترو لاره تر پوښتنې لاندې نه راولي، هغه وویل چې دا به اغیز ونه کړي، خو پلانونه به د لومړیتوبونو پراساس تنظیم شي.
د اتمر په وینا، افغانان له اوسني وضعیت څخه ناراضه دي، د اوږدې مودې لپاره یې نشي زغملی او سیمه او نړۍ هم له مخ پر ډېرېدو بې ثباتۍ او د کډوالۍ مسالې په اړه اندېښمن دي.
اتمر زیاته کړه، چې په تیرو څلورو کلونو کې سیاسي خوځښتونه د افغانانو ترمنځ د خبرو اترو په اړه خبرې کوي مګر دوی ته لومړیتوب نه دی ورکړل شوی.
هغه وویل چې د طالبانو ناتواني، سیمه ییزې اندېښنې او د افغانانو د روا غوښتنو د حل اړتیا هغه درې اصلي دلیلونه دي چې نوې انرژي رامینځته کوي او د افغانستان له اوسنیو ستونزو څخه د وتلو لپاره یوه اغیزناکه سیاسي پروسه جوړوي.
هغه خبرداری ورکړ، چې وسله والې ترهګریزې شبکې په سیمه کې فعالې دي او ځینې حکومتونه دا شبکې د خپلو موخو لپاره کاروي چې د افغانستان خلکو ته زیان رسوي.
د دې پوښتنې په ځواب کې چې خلک تاسې ته سولېدلې مهره هم وايي، اتمر وویل چې دا مهمه نه ده چې مهره مړه وي یا ژوندۍ خو اصلي پیغام دا دی چې که د افغانستان ستونزه حل نه شي، نو د سیمې او نړۍ ستونزه هم نشي حل کېدای.
د احمد مسعود، عبدالرشید دوستم، محمد اسماعیل خان، محمد حنیف اتمر، محمد یونس قانوني په ګډون یو شمیر سیاسي شخصیتونو نن په یوه انلاین غونډه او اعلامیه کې د ملګرو ملتونو او نړیوالې ټولنې تر څار لاندې د بین الافغاني سولې او خبرو اترو د پیل غوښتنه وکړه.
