د بنګلهدېش پوځ اعلان وکړ، چې د سوډان په ابیي سیمه کې د ملګرو ملتونو پر یوې لوژستیکي اډې د بېپیلوټه الوتکې په برید کې ۶ بنګلهدېشي سولهساتي ځواکونه وژل شوي او ۸ نور ټپیان دي. د بنګلهدېش پوځ وایي، له بریدګرو سره نښتې لا هم روانې دي.
دا پېښه د شنبې په ورځ (د لیندۍ ۲۲مه) رامنځته شوې ده. د بنګلهدېش پوځ وایي، له بریدګرو سره نښتې لا هم روانې دي او امنیتي وضعیت بېثباته دی.
د بنګلهدېش پوځ په یوه خبرپاڼه کې ویلي: «په دې سیمه کې وضعیت لا هم بېثباته دی او له ترهګرو سره نښتې دوام لري.»
په دې خبرپاڼه کې ټینګار شوی، چې اړوندو چارواکو د ټپیانو لپاره د درملنې خدمتونه، د ژغورنې او مرستې عملیات پیل کړي دي.
بنګلهدېش د ملګرو ملتونو د سولهساتو ماموریتونو له تر ټولو سترو ګډونوالو څخه دی او د دې هېواد ځواکونه له ډېرې مودې راهیسې د ابیي په سیمه کې مېشت دي؛ هغه سیمه چې د سوډان او سوېلي سوډان ترمنځ یوه ترینګلې او لانجمنه سیمه بلل کېږي.
