ډېری اسلامي هېوادونو په استرالیا کې پر یهودانو خونړی برید غندلی. سعودي عربستان د قربانیانو له کورنیو سره خواخوږي ښودلې او ایران هم دغه برید غندلی دی، خو طالبانو تر اوسه په دې اړه کوم غبرګون نه دی ښودلی. اسټرالیا په وروستیو کې د طالبانو پر ۱۴۰ مشرانو د بندیزونو کړنلاره چمتو کړې.
اې بيسي رپوټ ورکړی چې امنیتي ادارې د دې پېښې د څېړلو په حال کې دي چې ایا په دې کې خو به بهرنی لاس نه وي.
د اسراییل د ۱۲مې شبکې ویلي، چې استرالیا دا څېړي چې ایا د سیدني برید د ایران له خوا د پراخ پلان یوه برخه وه که نه.
د رپوټ له مخې، موساد شاوخوا یوه میاشت مخکې د استرالیا استخباراتي ادارو ته د ترهګریزو پېښو په اړه خبرداری ورکړی و.
موساد وړاندې ویلي و چې له سپاه قدس سره یوه تړلې شبکه د استرالیا په ګډون په لویدیزو هېوادونو کې پر یهودانو بریدونه ترسره کوي.
په رپوټ کې د اسراییلي استخباراتو له خولې ویل شوي چې سردار عمار د سپاه قدس یو لوړپوړی قوماندان د دې شبکې مشر دی.
ډېرو اسلامي هېوادونو د بونډای ساحل برید په تړاو غبرګون ښودلی دی.
د سعودي عربستان د بهرنیو چارو وزارت په یوه اعلامیه کې ویلي، « موږ په سیدني کې ترهګریز برید، چې څو کسان پکې وژل شوي او ټپیان شوي دي، غندو».
د متحده عربي اماراتو، ترکیې، قطر، اردن او ایران حکومتونو هم په سیدني کې د ډزې پېښه غندلې ده.
ایبيسي نیوز استرالیا رپوټ ورکړی چې د استرالیا امنیتي استخباراتو په ۲۰۱۹ کې یو بریدګر نوید اکرم د داعش له یوې ډلې سره د نږدې اړیکو له امله څارلی و.
په رپوټ کې کې ویل شوي چې د بونډای ساحل په ډزو کې د بریدګر په موټر کې د داعش بیرغ هم موندل شوی و.
د نیو ساوت ویلز د پولیسو کمېشنر مال لانیون ویلي چې د امریکا د استخباراتي رپوټونو او د نوید اکرم د موټرچلونې د اسنادو له مخې، هغه د پاکستان تبعه او د سیدني اوسېدونکی دی.
نوید اکرم ۲۴ کلن دی او د ټپي کېدو له امله په روغتون کې بستر دی.
چارواکي وایي چې د هغه وضعیت جدي خو باثباته دی. د هغه پلار ساجد اکرم د ډزو په پېښه کې وژل شوی دی.
