د روسیې د اپوزېسیون «یابلوکو» ګوند بنسټګر ګریګوري یاولینسکي ویلي، چې ګوند به یې د دوو جګپوړو غړو له نیول کېدو سره سره خپل سیاسي فعالیت جاري ساتي. نوموړي دا نیونې د راتلونکي کال له پارلماني ټاکنو وړاندې د ګوند مخنیوی بللی.
یابلوکو ګوند، چې د اوکراین جګړې د بندېدو غوښتنه کوي، د شوروي له ړنګېدو وروسته په لومړیو کلونو کې له مهمو لېبرال ګوندونو و، خو دا مهال یوازې په ځینو سیمهییزو شوراګانو کې محدود حضور لري او په ملي پارلمان کې څوکۍ نه لري.
په وروستیو میاشتو کې د ګوند دوه مرستیالان ماکسیم کروګلوف او لېو شلوسبرګ د روسي پوځ پر ضد د «دروغو خپرولو» په تور تر محاکمې مخکې نیول شوي، خو هغوی دا تورونه ردوي.
همداراز د ګوند بل مخکښ غړی بوریس ویشنفسکي د «بهرني اجنټ» په نوم نومول شوی دی.
یاولینسکي ویلي، چارواکي اندېښنه لري چې یابلوکو به د ۲۰۲۶ کال په پارلماني ټاکنو کې د هغو کسانو لپاره د جذب مرکز شي، چې په اوکراین کې د جګړې پای غواړي.
نوموړي زیاته کړه، چې دا مهال یوازې یابلوکو ګوند په ښکاره ډول د اوربند دریځ لري او همدا دریځ کولی شي پراخ ملاتړ ترلاسه کړي.
هغه ادعا وکړه، که څه هم په وروستیو کلونو کې د ګوند ملاتړ ټیټ و، خو د جګړې په اړه یې دریځ د خلکو له بدلېدونکي نظر سره سمون لري او ښايي د ملاتړ کچه تر ۳۰ یا ۴۰ سلنې پورې لوړه شي.
کرملین ویلي، د جګړې پر مهال ځینې محدودیتونه اړین دي، خو ټینګار کوي چې جنایي قضیې د محاکمو کار دی.
د روسیې حکومت همداراز ادعا کوي، چې ولسمشر ولادیمیر پوتین لا هم د هېواد تر ټولو محبوب سیاستوال دی او اکثریت روسان د اوکراین په اړه د هغه له تګلارې ملاتړ کوي.
خو د لېوادا مرکز د نومبر میاشتې یوه نظرپوښتنه ښيي، چې ۶۵ سلنه روسان د سولې خبرو ملاتړ کوي، په داسې حال کې چې یوازې ۲۶ سلنه د جګړې دوام غواړي.
