د جرمني حکومت اعلان کړی، چې د اوکراین د دفاع په برخه کې به خپله ژمنتیا لا پیاوړې کړي. همداراز به د دواړو هېوادونو د دفاع وزارتونه منظمې لوړکچې مشورتي غونډې کوي او په برلین کې به د اوکراین د دفاعي صنعت لپاره د اړیکو یو دفتر، چې «اوکراین فریډم هاوس» نومېږي، پرانیستل شي.
دا ژمنتیا به د ګډو صنعتي پروژو، د دفاعي بازارونو د لا ادغام او د فدرالي پانګونې د تضمینونو له لارې عملي شي.
دغه اقدامات د یوې ۱۰ مادېزې طرحې برخه دي چې د دوشنبې په ورځ د اوکراین د ولسمشر ولادیمیر زېلېنسکي د برلین د سفر پر مهال اعلان شوې ده.
اروپایي مشرانو دا طرحه د دې لپاره وړاندې کړې، چې د امریکا نوي ولسمشر ډونالډ ټرمپ ته دا پیغام ورکړي چې اروپا د اوکراین تر څنګ ولاړه ده، په داسې حال کې چې واشنګټن د نږدې څلور کلنې جګړې د پای ته رسولو لپاره د ډیپلوماټیکو هڅو چټکتیا غواړي.
په سند کې ویل شوي، چې د اوکراین پیاوړی دفاعي صنعت د روسیې د یرغل پر وړاندې د مقاومت لپاره حیاتي ارزښت لري او د راتلونکو بریدونو د مخنیوي لپاره د امنیتي تضمینونو مهمه برخه ده.
دا سند برلین ته د زېلېنسکي د سفر پر مهال شریک شو، چې هممهاله له امریکایي استازو سره د سولې خبرې هم روانې وې.
د جرمني او اوکراین حکومتونه به د دفاعي څېړنو، ګډو صنعتي پروژو او پوځي تدارکاتو په برخه کې همکاري نوره هم زیاته کړي. جرمني، چې په اروپا کې د اوکراین تر ټولو لوی ملاتړی هېواد دی، د فدرالي پانګونې د تضمینونو د کارولو امکان هم ارزوي.
د پلان له مخې، دواړه هېوادونه به د اوکراین جوړ دفاعي تجهیزات د ګډې پېرودنې له لارې وکاروي، چې د ناټو د هوايي حریم ساتنه د «اروپایي اسماني ډال» نوښت په چوکاټ کې پیاوړې شي.
جرمني به په کییف کې د خپلې پوځي اتاشې شمېر هم زیات کړي او د پوځي کارپوهانو ترمنځ به د تجربو تبادله نوره هم پراخه کړي.
په سند کې دا هم ویل شوي، چې دواړه هېوادونه به د فساد د مخنیوي لپاره جدي اقدامات وکړي.
