د طالبانو تر واک لاندې د کډوالو ستونزو ته د رسېدنې عالي کمېسیون د سېشنبې په ورځ (د لېندۍ ۲۵مه) خبر ورکړی، چې پرون له ایران او پاکستان نه ۵۷۷ کورنۍ چې ټولټال ۳۰۰۵ کسان کېږي؛ افغانستان ته ستنې شوې دي. د دغه کمېسیون په راپور راغلي، چې له دغه کډوالو سره مالي مرسته هم شوې ده.
د دغه کمېسیون د راپور له مخې؛ دغه کډوال د کندهار د سپین بولدک، د ننګرهار د تورخم، د هلمند د بهرامچې، د هرات د اسلامکلا او د نیمروز د ورېښمو پله له لارې ستانه کړای شوي دي.
په راپور کې راغلي، د دغه کسانو له ډلې د ننګرهار ولایت د تورخم له لارې ۲۹۹ کورنۍ، د کندهار د سپین بولدک له لارې ۱۵۵ کورنۍ، د هلمند د بهرامچې له لارې ۷۵ کورنۍ، د نیمروز د ورېښمو پله له لارې ۱۶ کورنۍ او د هرات د اسلامکلا له لارې ۳۲ کورنۍ افغانستان ته ستنې شوې دي.
راپور زیاتوي، د ټرانسپورټ، لېږد او مالي چارو د کمېټې له لوري دغه ستنېدونکو کورنیو ته شاوخوا ۷.۸ مېلیونه افغانۍ مالي مرسته او کرایه ورکړل شوې ده. دا په داسې حال کې ده، چې په پاکستان او ایران کې د افغان کډوالو وضعیت د اندېښنې وړ دی.
راپورونه ښيي، چې د پاکستان په بېلابېلو ښارونو کې د پولیسو د عملیاتو په لړ کې افغان کډوال د پلټنو، نیولو او جبري اېستلو له ګواښ سره مخ دي.
په ډېرو سیمو کې پولیسو د هغو کورونو دروازې هم ماتې کړې، چې ګومان کېده افغانان پهکې ژوند کوي. همدا راز په ایران کې هم د کډوالو پر وړاندې سخت اقدامات روان دي، چې له امله یې افغانان په بېباوره او ناامنه فضا کې ژوند تېروي.
له تېرو درېیو کلونو راهیسې له ګاونډیو هېوادونو د افغان کډوالو د اېستلو لړۍ چټکه شوې ده. د طالبانو د کډوالو او بېرته راستنېدونکو چارو وزارت هم خبر ورکړی، چې د یادې ډلې له واکمنېدو راهیسې له پاکستان، ایران او ترکیې هېوادونو ۵۹۷۸۶۳ کورنۍ چې د غړو شمېر یې ۴ مېلیونه او ۲۸۳زرو ته رسېږي او له ۲ مېلیونه ډېر مجردان په جبري ډول او خپله خوښه بېرته افغانستان ته ستانه شوي دي.
