ګوترېش: نړۍواله ټولنه باید د کډوالو د وضعیت د ښه کېدو لپاره لا ډېر مسولانه ګامونه واخلي
د ملګرو ملتونو سرمنشي انتونیو ګوترېش وايي، چې له تېرو دوو کلونو راهیسې په نړۍ کې جګړې او د خلکو بېځایه کېدل ډېر شوي او د بشري مرستو بودیجې د پام وړ کمې شوې دي.
د ملګرو ملتونو سرمنشي انتونیو ګوترېش وايي، چې له تېرو دوو کلونو راهیسې په نړۍ کې جګړې او د خلکو بېځایه کېدل ډېر شوي او د بشري مرستو بودیجې د پام وړ کمې شوې دي.
ګوترېش دا څرګندونې د کډوالو نړۍوال فورم ته په اشارې کړې دي او ټینګار یې کړی، چې نړۍواله ټولنه باید د کډوالو د وضعیت د ښه کېدو لپاره لا ډېر مسولانه ګامونه واخلي.
د ملګرو ملتونو سرمنشي له نړۍ څخه وغوښتل، چې د کډوالو او کوربه ټولنو د ملاتړ لپاره دې پانګونه زیاته کړي او د پناهغوښتنې او خوندیتوب له نړۍوال حق څخه دې دفاع وکړي.
نوموړي زیاته کړه، چې د کډوالو حقونه باید خوندي وساتل شي او نړۍوال باید د هغو خلکو ترڅنګ ودرېږي، چې د جګړو او کړکېچونو له امله خپل کورونه پرېښي دي.
بلخوا، د بښنې نړۍوال سازمان وايي چې افغانستان ته د پناهغوښتونکو او کډوالو جبري ستنول باید سملاسي ودرول شي. د بښنې نړۍوال سازمان د ملګرو ملتونو د احصایو له مخې ویلي، چې یوازې ایران او پاکستان په ۲۰۲۵ کال کې له ۲،۶ میلیونو ډېر افغانان په غېرقانوني ډول افغانستان ته شړلي دي.
د بښنې نړۍوال سازمان نن سېشنبه د لیندۍ ۲۵مه په یوه راپور کې وویل، چې دغه شمېر افغان کډوال په داسې حال کې اېستل کېږي، چې طالبانو محدودیتونه او له بشري حقونو سرغړونې زیاتې کړې دي، په ځانګړې توګه د ښځو او نجونو ژوند یې اغیزمن کړی دی.
د بښنې نړۍوال سازمان وايي، په افغانستان کې بشري ناورین د راستنیدونکو لپاره د زیان خطر ډېر کړی دی او هیوادونه د نړۍوال قانون له مخې حق نهلري چې خلک هغو ځایونو ته واستوي چې هلته د بشري حقونو سرغړونې له جدي ګواښ سره مخ دي.
د بښنې نړۍوال سازمان وايي، چې د طالبانو تر واکمنۍ لاندې مېرمنې او نجونې په سیستماتیک ډول له عامه ژوند څخه اېستل شوې دي.
دوی له ۱۲ کلنۍ وروسته له زدهکړې منع شوې دي، د تګراتګ او بیان ازادي محدوده شوې او له ملګرو ملتونو، نادولتي موسسو او دولتي ادارو سره یې پر کار بندیز لګېدلی دی.
د راپور له مخې، یوازې د همدې کال د جولای او اکټوبر ترمنځ له ایران څخه له ۹۰۰ زرو ډېر افغانان په غېرقانوني ډول اېستل شوي، چې د ۲۰۲۵ کال له جنورۍ څخه تر اکټوبر پورې د ټولو اخراج شویو کسانو شمیر ۱،۶ میلیون تنو ته رسېږي.
