نبیل: د پاکستان د ترهګرۍ ضد فعالیتونه د ډيپلوماټيکو محاسبو برخه ده، نه اصولي تګلاره

هند په تېرو دوو لسیزو کې د افغان ناروغانو د درملنې له مهمو ادرسونو څخه و او هره ورځ له کابل او یو شمېر ولایتونو څخه نوي ډیلي ته څو الوتنې کېدې. خو د طالبانو له بیا واک ته رسېدو وروسته هند افغانانو ته د ویزې ورکړې بهیر په بشپړ ډول ودراوه او ان هغه ویزې یې هم لغو کړې وې، چې تر دې مخکې صادرې شوې وې.

دغه هندي چارواکي همدارنګه وویل، چې هېواد یې په دې وروستیو کې د افغانستان د روغتیايي زیربناوو په برخو کې څو مهمې پروژې منظورې او عملي کړې دي.

هندو ورځپاڼې د دغه هېواد د روغتیا وزارت د یوه چارواکي له نوم ښودلو پرته د هغه په حواله لیکلي، چې په دې پروژو کې په پکتیا، خوست او پکتیکا ولایتونو کې د پنځو زیږنتونونو او روغتیایی کلینیکونو جوړول، په کابل کې د ۳۰ بستریز روغتون جوړول او همداراز د سرطان او د سختو ټپونو د درملنې مرکزونه، د طبي تشخیص مرکز او په کابل کې د تلسیمیا د درملنې مرکز په څېر د مهمو تاسیساتو جوړول او پیاوړي کول شامل دي.

نوموړي زیاته کړې، چې د افغانستان د روغتیا سکتور د لا زیات ملاتړ لپاره نورې طرحې هم تر ارزونې لاندې دي.

په ورته وخت کې د طالبانو او هند د روغتیا وزیرانو په وروستۍ لیدنه کې نوي ډیلي یو ځل بیا له افغانستان سره د روغتیايي همکاریو او بشري مرستو د دوام ژمنه تکرار کړه.

په دې لیدنه کې دواړو لورو د روغتیا په برخه کې روانې همکارۍ وڅېړلې او د روغتیايي زیربناوو د لا پیاوړتیا، د درملو او طبي تجهیزاتو د برابرولو او د روغتیايي کادرونو د روزنې په اړه یې خبرې وکړې.

د هند د عامې روغتیا وزیر په دې ناسته کې وویل، چې هېواد یې په تېرو څلورو کلونو کې افغانستان ته ۳۲۷ ټُنه درمل او واکسینونه لېږلي دي. همدارنګه د سرطان ناروغانو لپاره ځانګړي درمل او د سي‌ټي‌سکن یو ماشین، چې د طالبانو د عامې روغتیا وزارت په غوښتنه برابرې شوې د لېږلو لپاره چمتو دي او د روانې میاشتې تر پایه به افغانستان ته وسپارل شي.

د هندي چارواکو په وینا ټاکل شوې، چې د لوړپوړو هندي ډاکترانو یوه ډله هم افغانستان ته د افغان ډاکټرانو د لا روزنې لپاره ولېږل شي.

د طالبانو د چاپیریال ساتنې ادارې د پنجشنبې په ورځ (د لیندۍ ۲۷مه) په یوې خبرپاڼه کې ویلي، یو تن یې په کابل کې د قزق لاق وحشي مرغه د پلور پر مهال لاس په لاس نیولی دی.

دغه کس یاد مرغه د پروان په چاریکار کې ښکار کړی او د خرڅلاو په موخه یې کابل ته وړی و، خو له خرڅلاو مخکې د دغې ادارې د کارکوونکو له لوري نیول شوی او ورڅخه په کتبي بڼه د ښکار نه‌کولو ضمانت اخیستل شوی چې بیا به دا کار نه‌کوي.

د خبرپاڼې د معلوماتو له‌مخې، د پکتیکا د شخېل اباد ولسوالۍ کې یې هم ۱۷ ښکاریان له وسایلو سره نیولي او د قانوني چلند لپاره یې امنیتي ادارو ته سپارلي دي.

طالبانو خبردارۍ ورکړی، چې په ټول افغانستان کې د حیواناتو، وحشي‌ژوو، مرغانو او کبانو پر ښکار بندیز دی او له سرغړونکو سره به جدي قانوني چلند وشي.

د طالبانو تر واک لاندې د افغانستان بانک مرستیال صدیق‌الله خالد د پنجشنبې په ورځ (د لیندۍ ۲۷مه) ویلي، چې له ټولو نړۍوالو مالي او بانکي بنسټونو سره د اغېزناکو او دوامداره اړیکو غوښتونکي دي.

نوموړي زیاته کړې، چې دوی د قرغزستان له جمهوري دولت سره د سوداګریزو اړیکو د پراختیا په موخه منظمې بانکي اړیکې رامنځته کړې دي.

د خالد په خبره، د بانکي همکاریو پیاوړتیا کولی شي د دواړو هېوادونو ترمنځ د سوداګرۍ، پانګونې او اقتصادي تعاملاتو په برخو کې اسانتیاوې رامنځته کړي.

د قرغزستان د مالیې وزارت د مرستیال په مشرۍ پلاوي هم په دې کتنه کې د دواړو هېوادونو ترمنځ د بانکي او اقتصادي همکاریو د پراخېدو لپاره چمتوالی ښودلی دی.

د طالبانو د افغانستان بانک مسوولینو دا هم ویلي، چې په دې کتنه کې د دواړو لورو تر منځ د چارو د تعقیب او پرمختګ لپاره د تخنیکي کمېټو پر جوړېدو هم هوکړه شوې ده.

د یادونې وړ ده، چې پر افغانستان د طالبانو له بیا واکمنېدو راهیسې د دغه هېواد بانکي سیستم له ګڼو محدودیتونو سره مخ شوی او له امله یې سوداګریز بهیر اغېزمن او سوداګر یې سخت اندېښمن کړي دي.

ندا محمد ندیم د پنجشنبې په ورځ (د لیندۍ ۲۷مه) د وردګ پوهنتون لپاره د ۱۸۰ میلیونه افغانیو په ارزښت د زده‌کړیالانو لپاره د څلور پوړيزې ليليې ودانۍ د جوړېدو چارو په پرانېستغونډه کې وویل، د مسلمانانو «امیر» ته د مسلمانانو د دین او دنیا ساتنه ور تر غاړې دي.

ندیم زیاته کړه، «موږ هم د اسلامي نظام منسوبین او مسوولین یو او د مسلمانانو د دین او دنیا د چارو ساتنه او د هغوی خدمت به کوو.»

د نوموړي په وینا، د پوهنتونونو د استادانو ژمنتیا او د مسوولینو له‌خوا هغوی ته هر اړخیز ډاډ کولی شي د لوړو زده کړو نظام لا پیاوړی کړي.

ندا محمد ندیم د هېواد ټولو پوهنتونونو ته د بودجې، اسانتیاوو او مناسب چاپېریال د برابرولو ژمنه هم وکړه.

طالبانو ویلي، چې دغه لیلیه څلور پوړه، دوه بلاکه او په یوه خت کې د ۱۶۰۰ زده‌کړیالانو د اوسېدو ظرفیت لري.

د طالبانو د لوړو زده کړو وزیر په دې وروستیو کې د خپلو ویناو ډېره برخه له «خپل مشر څخه په ملاتړ» او د هغه د فرمانونو په عملي کولو را څرخي.

د هند روغتیا وزارت ویلي، چې د پنجشنبې په ورځ د یاد هېواد د روغتیا وزیر جي پي ناډا د طالبانو د روغتیا وزیر نورالله جلالي سره لېدنه کې د روغتايي همکاریو، روغتیايي زیربنا او ظرفیت لوړولو په برخو کې د همکارۍ پراختیا په تړاو خبرې کړې دي.

د هند د روغتیا وزیر ویلي، «د هند لومړي وزیر نرېندرا مودي تل ټینګار کوي، چې له افغانستان سره د هند ښکیلتیا باید د بشري مرستو، ظرفیت لوړولو او مهمو روغتیايي خدماتو ته پر لاسرسي تمرکز ولري.»

نوموړي ویلي، چې هند د افغانستان له خلکو سره د اوږدمهاله اړیکو پر بنسټ خپلو بشرې مرستو ته دوام ورکوي.

د هند د روغتیا وزارت د تېرو څو کلونو پرمهال د کابل په ګډون په پکتیا، خوست، پکتیکا او نورو ولایتونو کې د کلینیکونو جوړولو یادونه هم کړې او وايي، چې په تېرو څلورو کلونو کې یې افغانستان ته ۳۲۷ ټنه درمل او واکسینونه هم لېږلي دي.

په خبرپاڼه کې ویل شوي، چې د طالبانو د عامې روغتیا وزارت د غوښتنې له مخې به نوي کال ته ډېر ژر د سرطاني ناروغیو درمل او د سي ټي سکن یو ماشین هم کابل ته ولیږدوي.

هند ویلي، پلان لري، چې د افغان ډاکټرانو د ظرفیت لوړولو په برخه کې به ډېر ژر د تجربه لرونکو هندي ډاکټرانو یوه ډله افغانستان ته واستوي؛ یاد ډاکټران به په افغانستان کې روغتیايي کمپونه تنظیم او افغان ډاکټرانو ته عملي روزنه ورکړي.

د هند روغتیا وزارت ویلي، چې په تېرو څلورو میاشتو کې یې افغانانو ته شاوخوا ۲۰۰ روغتیايي ویزې ورکړې دي او په ژمنه یې کړې، چې د افغان بېړنیو او جدي ناروغانو درملنه په وړیا ډول په هند کې کوي.

مولوي نورجلال جلالي په هند کې د دودیز طب په نړیواله غونډه کې هم ګډون کړی دی.

د طالبانو د عامې روغتيا وزارت ویلي، چې د دودیز طب معياري کېدل په دې برخه کې د فعالو کسانو روزنه، د يو واقعيت په توګه یې پېژندل او د دودیز طب او ددواړو هېوادونو د تجربو شريکول د دې غونډې د بحث اصلي محور و.

د نړیوال روغتیا سازمان په دې ناسته کې د ۲۳ هېوادونو دروغتيا وزيرانو او استازو ګډون کړی و.