هرات کې ځايي سرچینو افغانستان انټرنشنل - پښتو ته ویلي چې د افغان کډوالو یوه ډله چې ایران ته په لاره و، د سړې هوا له امله د ایران په خاوره کې مړه شوي دي. سرچینو ویلي، د ۱۵ کسانو جسدونه د هرات د کهسان او ادرسکن ولسوالیو ته لیږدول شوي دي. ځینو سرچینو د مړو شویو شمېر لسګونه ښودلی.
افغانستان انټرنشنل - پښتو په ایران کې له یوه افغان کډوال سره خبرې وکړې چې د ایران د مزار شهدا او تایباد روغتونونو د مړو د ساتلو سړو خونو څخه یې لیدنه کړې وه، هغه وویل چې له څلوېښتو څخه ډیر افغان کډوال مړه شوي دي.
دا شمیره لا تر اوسه په رسمي ډول تایید شوې نه ده. خو ډیری افغان کډوال د ایران په پوله کې لا هم ورک دي.
سرچینو ویلي چې په دې وروستیو ورځو کې سلګونه خلک د ایران په لور روان شوي و، چې په لاره کې د سختې سړې هوا سره مخ شوي دي. دا بهیر لاهم ادامه لري.
ویل کیږي چې دغه خلکو هڅه کوله چې له غیر رسمي لارې ایران ته ننوځي خو په پوله کې موسم ډېر باراني او هوا سړه وه.
ځینو سرچینو ویلي چې د مړو شویو کسانو وارثان لا هم د خپلوانو د جسدونو په لټه کې دي.
ایران او طالب چارواکو تر دې دمه په دې اړه کومه تبصره نه ده کړې.
