له کابل څخه افغانستان انټرنشنل- پښتو ته رسېدلي معلومات ښيي، چې د کابل ښاروالۍ لپاره طالب چارواکو پر کباړ پلورنځيو د حضوري چمن د بدلولو چارې پیل کړې دي. فرهنګپالو پر دې کار په نیوکو سره ویلي، که طالب چارواکي دا شاړ شوی تاریخي چمن سمسورولی نهشي، کباړ پلورنځي دې هم پهکې نهجوړوي.
د فرهنګپالو په وینا، د طالبانو د دې پرېکړې د تطبيق دوام به د دغه چمن د لرغونتوب تر څنګ د ښار ښکلا ته هم تاوان واړوي.
د کابل ښاروالۍ لپاره د طالبانو چارواکو په دې اړه څه نهدي ويلي، خو په ټولنیزو رسنیو کې د طالبانو يوه ملاتړي رحیم سکندر دا پرېکړه ستايلې او زیاته کړې یې ده، چې افغانان تر تفریح او سپورټ د «خېټو» مړولو ته ډېره اړتيا لري.
حضوري چمن د ارګ ماڼۍ او کابل سیند ته په څو کيلو مترۍ کې پروت دی، چې لرغونتوب یې ۱۶مې زيږديزې پېړۍ ته رسیږي.
په هند کې د مغولي امپراتورۍ بنسټګر بابر شاه په خپل اثر« بابر نامه» کې د دې سیمې له ښايسته منظرو يادونه کړې ده.
د ډاکټر نجيب الله د حکومت تر نسکورېدو په حضوري چمن کې پراخ جشنونه، کنسرټونه، سپورټي سيالۍ او تفریحي پروګرامونه جوړېدل.
د جهادي تنظیمونو د خپلمنځيو جګړو پر مهال له دې چمن څخه د پوځي هدفونو او د طالبانو د تېرې او اوسنۍ واکمنۍ پر مهال له دې تاریخي چمن څخه د شرعي حدودو د تطبيق په نوم د تورنو کسانو د مجازاتو نندارې ته د خلکو د را ټولولو کار اخیستل شوی دی.
څو ورځې مخکې د کابل ښاروالۍ لپاره د طالبانو چارواکو د اريانا پخوانۍ سینما هم ويجاړه او پر ځای یې د یوه سوداګريز مرکز له جوړولو خبر ورکړ.
