د طالبانو د کورنیو چارو وزارت وايي، د کابل د منډوي د بوټانو په بازار کې د اورلګېدنې پېښه په وخت د عامه نظم او اور وژنې ځواکونو له خوا کنټرول شوې او د خلکو د مالي او ځاني زیان مخه یې نیولې ده.
دغه وزارت په خپره کړې خبرپاڼه کې ویلي، د عامه نظم او اور وژنې ځواکونو د منډوي په بوټان بازار کې د اور د خپرېدو پر مهال چټک اقدام وکړ او د ۸ دوکانونو او ۱۰ ګدامونو اور وژنه یې په موثره توګه ترسره کړه.
په خبرپاڼه کې راغلي، چې د پېښې د کنټرول په نتیجه کې شاوخوا ۷۰۰ زره ډالر ارزښت لرونکي مالونه خوندي شوي او نږدې ۱۵۰ میلیون افغانۍ اموال ژغورل شوي دي.
چارواکي د اورلګېدنې د نورو پېښو د مخنیوي لپاره له خلکو غوښتي چې د اور د خوندیتوب تدابیر په پام کې ونیسي او د اور وژنې ادارې لارښوونې په کلکه رعایت کړي.
