د اسراییل امنیتي شورا په لوېدیځه غاړه کې د ۱۹ نویو ښارګوټو له جوړولو سره موافقه وکړه. له دې پرېکړې سره، په تېرو درېیو کلونو کې د هغو نویو ښارګوټو شمېر چې جواز یې ترلاسه کړی، ۶۹ ته ورسېد.
د اسراییل د ماليې وزیر بتزالل اسموتریچ دفتر د یکشنبې په ورځ (د لیندۍ ۳۰مه) په یوې خبرپاڼه کې اعلان وکړ، چې په یوه «تاریخي اقدام» کې د اسراییل امنیتي کابینې د اسموتریچ او د دفاع وزیر یسراییل کاټز له وړاندیز سره د لوېدیځې غاړې په سیمه کې د نویو ښارګوټو د تصویب او منظمولو په موخه موافقه کړې ده.
د دې خبرپاڼې له مخې، د دغو ښارګوټو موقعیتونه «لوړ ستراتیژیک اهمیت» لري او تر ټولو مهم یې د غانیم او کادیم د دوو ښارګوټو بیا رغونه او بیا مېشت کېدل دي. دغه دواړه ښارګوټي تر دې مخکې د لوېدیځې غاړې په شمال کې ړنګ شوي وو.
امنیتي کابینه یا «وړه کابینه» د اسراییل د حکومت د یو شمېر مهمو وزیرانو څخه جوړه ده. دا ډله د اسراییل د هغو مهمو امنیتي او بهرنۍ پالیسۍ موضوعاتو په اړه پرېکړې کوي، چې یا محرم وي او یا یې په لویه کابینه کې پرېکړه کول ډېر وخت نیسي.
د ملګرو ملتونو د سرمنشي انتونیو ګوترېش د خپور شوي راپور له مخې، په روان میلادي کال کې د لوېدیځې غاړې په سیمه کې د اسراییلي ښارګوټو پراختیا له ۲۰۱۷ کال راهیسې چې ملګرو ملتونو یې څارنه پیل کړې، تر ټولو لوړې کچې ته رسېدلې ده.
د ګوترېش د راپور له مخې، په ۲۰۲۵ کال کې په ټولییز ډول د شاوخوا ۴۷ زره او ۳۹۰ استوګنیزو واحدونو لپاره داوطلبۍ وړاندې شوي، تایید شوي او یا پرانېستل شوې دي.
دا شمېر په ۲۰۲۴ کال کې شاوخوا ۲۶ زره او ۱۷۰ استوګنیزو واحدونو ته رسېده.
د بشري حقونو د څار سازمان د راپور له مخې، د اکټوبر په اوومه د حماس د برید له پیل راهیسې اسراییلي ځواکونو په لوېدیځه غاړه کې نږدې زر فلسطینیان وژلي، له محاکمې پرته نیونې یې پراخې کړي، ګڼ کورونه یې نړولي او د ښارګوټو د جوړولو بهیر یې چټک کړی دی.
انتونیو ګوترېش هم د تېرو کلونو په پرتله د څرګند زیاتوالي په یادولو سره ویلي، چې د ۲۰۱۷ او ۲۰۲۲ کلونو ترمنځ د ښارګوټو د جوړولو کلنی اوسط شاوخوا ۱۲ زره او ۸۰۰ واحدونه و.
نوموړي خبرداری ورکړی، چې په لوېدیځه غاړه کې د اسراییل لهخوا د ښارګوټو پرلهپسې پراختیا تاوتریخوالی زیاتوي، فلسطینیانو ته خپلو ځمکو ته لاسرسی محدودوي او د یوه خپلواک، ډېموکراتیک او بشپړ حاکمیت لرونکي فلسطیني دولت د جوړېدو امکان له ګواښ سره مخ کوي.
د ختیځ بیتالمقدس له حساب پرته چې اسراییل له خپلې خاورې سره یوځای کړی، دا مهال له ۵۰۰ زرو ډېر اسراییلیان د لوېدیځې غاړې په ښارګوټو کې ژوند کوي؛ هغه ښارګوټي چې ملګري ملتونه یې د نړۍوالو قوانینو لهمخې ناقانونه بولي.
