که له یوې خوا د عضلاتو د جوړولو لپاره سخت ورزش، وخت او هڅه ضروري وي، له بلې خوا یې پایلې هم ډېرې مثبتې دي. ځکه له دې سره د عضلاتو ځواک زیاتېږي، د بدن اضافي غوړ کمېږي او د کالوریو سوځولو وړتیا لوړېږي.
خو که له تمرین یا جېم ته د تللو سره سره کوم بدلون نه احساسوئ، ښايي ځینې عام خو ناسم عادتونه یې لامل وي. له ناسمو خوړو تر ناسم تمرین پورې ځینې عادتونه د عضلاتو د جوړېدو بهیر ګډوډوي او ان د درد او ستونزو لامل ګرځي.
راځئ هغه عادتونه وڅېړو چې عضلاتو ته زیان رسوي.
په کافي اندازه اوبه نهڅښل
که تاسې په کافي اندازه اوبه ونهڅښئ، عضلاتو ته زیان رسېږي، ځکه د بدن د اوبو کمښت وینه ټینګه کوي او عضلاتو ته د اکسیجن رسېدل کمېږي. همداراز، د اوبو کموالی د عضلاتو د ستړیا لامل کېږي او د درد خطر زیاتوي.
له تمرین مخکې ګرمول (وارماپ) له پامه غورځول
له سخت تمرین مخکې وارماپ عضلاتو ته تودوخه ورکوي، چې له امله یې وینه عضلاتو ته ښه رسېږي. دا کار د بندونو نرموالی یا انعطاف زیاتوي او د تمرین پر مهال د ټپي کېدو او درد خطر کموي.
په کافي اندازه خواړه نهخوړل
له کافي مقدار خوړو پرته عضلات نهشي جوړېدای. د دې لپاره اړینه ده، چې هره ورځ د پروټین مناسبه اندازه وخوړل شي، تر څو د عضلاتو وده چټکه شي. همدارنګه سالمې غلې، مېوې، سبزيانې او د شېدو محصولات کېدونکي کاربوهایډرېټونه د عضلاتو انرژي زیاتوي.
لږ یا ناسم خوب
کله چې د وزن زیاتولو تمرین کوئ، پر عضلاتو مو ځینې فشارونه راځي چې د بیا جوړېدو بهیر چټکوي او عضلات پیاوړي کوي. خو د دې لپاره ښه او ژور خوب ضروري دی. د ژور خوب پر مهال داسې هورمونونه ازادېږي، چې د عضلاتو ترمیم او د نسجونو په وده کې مرسته کوي. د خوب کموالی برعکس اغېز لري او د کورټیسول په نوم د فشار هورمون کچه لوړوي، چې د عضلاتو وده زیانمنوي.
تمباکو څکول
د تمباکو څکول عضلاتو ته د اکسیجن رسېدل کموي، چې له امله یې د هغوی فعالیت اغېزمنېږي.
همدارنګه د عضلاتو جوړوونکي پروټینونه سم نه پروسس کېږي او د عضلاتو ثبات ساتل هم ګرانېږي.
تمرین کې عضلاتو ته دمه ورکول
ډېر تمرین د عضلاتو فشار زیاتوي او که دمه ونهشي، عضلاتو ته زیان رسېدای شي.
دمه کول د ټپي کېدو خطر کموي، د عضلاتو وده ښه کوي او عمومي فعالیت هم لوړوي.
ډېر وخت ناست پاتې کېدل
د ورځې ډېره برخه په ناستې تېرول د زړه ناروغیو، شکرې او د سرطان د ځینو ډولونو خطر زیاتوي.
تر څنګ یې د عضلاتو حجم کمېږي او کمزوري کېږي، ان که د وزن زیاتولو تمرین هم کوئ، بیا هم اوږده ناسته د تمرین ګټې راکموي.
