پاکستانۍ ورځپاڼۍ «اېکسپرېس ټریبیون» راپور ورکړی، چې طالبان د قطر او ترکیې په څېر د منځګړو هېوادونو تر فشار لاندې له پاکستان سره د تاوتریخوالي د کمولو او د دغه هېواد د امنیتي اندېښنو د هواري لپاره ځینې عملي ګامونه پورته کړي.
د راپور لهمخې، که څه هم د طالبانو او پاکستان ترمنځ اړیکې په ښکاره ډول بنبست ته رسېدلي، خو د پردې تر شا ډیپلوماسۍ د قهرجنو دریځونو د نرمولو او د مخامخ تقابل پر ځای د خبرو اترو د ژوندي ساتلو هڅه کړې.
اېکسپرېس ټریبون د خپلو سرچینو په حواله راپور ورکړی، چې منځګړو هېوادونو هڅه کړې څو د طالبانو او پاکستان ترمنځ د لفظي جګړې شدت راکم کړي او د خبرو لپاره لږ تر لږه مثبته فضا رامنځته کړي؛ داسې هڅې چې د سرچینو په وینا، طالبان یې د فتوا ورکولو او په افغانستان کې د ټيټيپي د فعالیت د مخنیوي په اړه د یوې روښانه اعلامیې خپرولو ته هڅولي دي.
قطر، ترکیه، سعودي عربستان، ایران، متحده عربي امارات او چین د طالبانو او پاکستان ترمنځ د ترینګلتیاوو د کمولو په برخه کې د منځګړیتوب رول لوبولی دی. قطر، ترکیه او سعودي عربستان بیا په رسمي توګه د طالبانو او پاکستان د پلاویو د مذاکراتو او خبرو اترو کوربهتوب کړی او له دې سره ایران، متحده عربي امارات او چین هم په دې برخه کې ښکېل پاتې دي.
په راپور کې زیاته شوې، چې دا مهال دواړه خواوې خپلې تګلارې سموي، له دې ډډه کوي چې شخړه په علني ډول زیاته کړي، د روغې جوړې لهجه کاروي او دیني عالمانو ته اجازه ورکوي چې منځګړتوب وکړي.
دا په داسې حال کې ده، تر هغه وروسته چې د طالبانو د علماوو شورا د پاکستان جګړه ناروا وبلله، ترینګلتیاوې کمې شوې دي. دغه شورا تېره میاشت په کابل کې په یوه ناسته کې اعلان وکړ، چې له کرښو بهر په جګړو کې د افغانان ګډون ناروا ده.
له دې سره سم، د طالبانو د کورنیو چارو وزیر سراجالدین حقاني بیا پاکستان ته ډاډ ورکړ، چې د افغانستان له خاورې به د هېڅ بل هېواد پر ضد استفاده و نهشي. د پاکستاني چارواکو په وینا، دا څرګندونې د ترینګلتیاوو د کمولو او د لهلاسوتلي باور د بېرته راژوندي کولو د پراخې هڅې برخه ده.
د پاکستان د بهرنیو چارو وزیر اسحاق ډار بیا د شنبې په ورځ د حقاني له څرګندونو هرکلی وکړ او د شخړو د هوارولو لپاره یې د مخامخ تقابل پر ځای د خبرو اترو له لارې د حل لارې ملاتړ وستایه.
اېکسپرېس ټریبیون د خپل راپور په یوه برخه کې لیکلي، چې د شخړې په دواړو خواوو کې مذهبي مراجعو د باور جوړونې او د کړکېچ کمولو په برخه کې فعاله ونډه اخیستې ده. دا مذهبي مراجع په داسې حال کې اقدام ته وردانګلي، چې تر دې وړاندې د دواړو خواوو ترمنځ ډیپلوماتیکې خبرې کومې پایلې ته نه وې رسېدلې. د پاکستان او طالبانو ترمنځ رسمي خبرې اترې په دوحه، استانبول او سعودي عربستان کې پرته له کوم پرمختګ پای ته ورسېدې.
پاکستان په ځلونو ټینګار کړی، چې د طالبانو له ادارې سره د اړیکو ښهوالی باید د تحریک طالبان پاکستان «ټيټيپي» پر ضد د تصدیق وړ اقداماتو پورې تړلی وي، ځکه اسلاماباد ادعا کوي، چې ټيټيپي د افغانستان له خاورې د دوی پر امنیتي ځواکونو بریدونه کوي.
خو طالبانو تل ویلي، چې دوی هېچا ته اجازه نه ورکوي چې د افغانستان له خاورې پر بل هېواد برید وشي.
