د هرات ولایت طالب چارواکي وايي، په تېرو ۹ میاشتو کې له دغه ولایت څخه ۲۲٬۰۲۴ټنه تازه مېوې بهر ته صادر شوې چې ارزښت یې تر ۱۶ میلیونو ډالرو ډېر دی، دچارواکو په وینا، دې صادراتو د سیمې د اقتصاد او د بزګرانو عوایدو په زیاتولو کې مهم رول لوبولی دی.
د هرات ولایت مقام له خوا په خپره شوې خبرپاڼه کې راغلي، په تېرو ۹ میاشتو کې د دغه ولایت ۲۲٬۰۲۴ټنه تازه مېوې، د ۱۶٬۳۳۳٬۶۹۲ډالرو په ارزښت، بهرنیو بازارونو ته صادرې شوې دي.
خبرپانه زیاتوي، د صادرو شوو مېوو په کتګوریو کې بېلابېل میوې شامل دي چې ګڼو هېوادونو ته صادر شوي دي.
مقام په دې اړه ټینګار کړی چې دغه صادرات د هرات د اقتصاد د ودې او د بزګررانو د عوایدو په زیاتوالي کې مهمه ونډه لري.
د هرات ولایت مقام څرګنده کړې چې د ولایت د تولید او صادراتو ظرفیت لوړ دی او هیله من دي چې په راتلونکي کې د اسانتیاوو د برابرېدو سره به د صادراتو کچه نوره هم لوړه شي.
