د جمهوري نظام پر مهال د افغانستان د اطلاعاتو او کلتور وزیر عبدالکریم خرم، د امریکا له لوري پر ونزویلا برید ته په غبرګون کې ویلي، چې دا وضعیت ښيي چې ۲۰۲۶ کال به د جګړو کال وي او افغانستان ته به هم بدې پایلې ولري.
خرم وایي دغه څرګندونې پر خپل اکس پاڼه کړې او ویلي یې دي، چې د دغو پېښو له امله نړیوال حقوق، ډېپلوماټیک اصول، د دولتونو حاکمیت او د ملګرو ملتونو منشور خپل ارزښت له لاسه ورکوي او پر ځای یې د زور سیاست حاکمېږي.
نوموړي ټینګار کړی چې پر ونزویلا برید به د سیمې او افغانستان لپاره هم بدې پایلې ولري.
د هغه په وینا، تر ټولو ستر زیان چین ته رسېږي، ځکه چین د ونزویلا د تېلو شاوخوا ۸۰ سلنه پېرودونکی و او له عملیاتو څو ساعته وړاندې مادورو د چین د لوړپوړي پلاوي کوربه و.
دا وضعیت د چین پانګونې له خطر سره مخ کوي او ښايي چین اړ شي د تېلو اړتیا له روسیې پوره کړي. خرم دا هم د لاتینې امریکا څخه د چین د شړلو د بهیر پیل بولي.
هغه زیاتوي، داسې اټکل کېږي چې پر ونزویلا برید د ایران پر ضد د احتمالي برید پیلامه وي، ځکه امریکا د هرمز تنګي د تړل کېدو له امله د تېلو د صادراتو د درېدلو اندېښنه لري او ونزویلا د بدیل په توګه ارزوي.
د کریم خرم په خبره، که دا سناریو عملي شي، د افغانستان دوه ګاونډي هېوادونه به مستقیم اغېزمن شي، چې دا به په طبیعي ډول پر افغانستان هم اغېز ولري.
