د خېبر پښتونخوا په چارسده کې د یوه کور د چت پرېوتو له امله د پنځو ماشومانو په ګډون شپږ کسان مړه او پنځه ښځې ټپیانې شوې دي. د پولیسو په وینا؛ دغه پېښه د چارسدې د شبقدر په خیراباد سیمه کې شوې ده.
ځایي پولیسو ویلي، چې ټپیان روغتون ته لېږدول شوي دي. دوی زیاتوي، چې مړي او ټپیان له پېښور او خیبر څخه شبقدر ته د واده په مراسمو کې د ګډون لپاره ورغلي وو.
د عوامي نشنل ګوند مرکزي کمیټې ویلي، چې له افغانستان سره دې ټول مسایل د جګړې پرځای د خبرو او ترو له لارې حل شي او ژر تر ژره دې تړل شوې سوداګریزې لارې بېرته پرانېستل شي.
د عوامي نشنل ګوند د مرکزي کمیټې ناسته ددغه ګوند د مشر اېمیل ولي خان په مشری او د مرکزي کمیټې د غړو په ګډون شوې ده.
په دې ناسته کې د پاکستان او افغانستان ترمنځ روان کړکېچ د سیمې امنیت لپاره ستر ګواښ ګڼل شوی دی.
د ګوند مرکزي شورا وايي چې له افغانستان سره روانو شخړو او د لارو بندېدو له امله زرګونه پاکستانيان، په ځانګړي ډول پښتون زده کوونکي او عام خلک له تېرو څو میاشتو راهیسې په افغانستان کې بند پاتې دي. شورا د دې خلکو د بیرته راوستلو لپاره بیړني اقدامات غواړي.
په دې ناسته کې د پاکستان د ۲۵ اساسي قانون تعدیل له لارې د خیبرپښتونخوا مدغم شویو ولسوالیو ته د شویو ژمنو د نه پوره کیدو په اړه جدي اندیښنه ښودل شوې ده.
عوامي نشنل ګوند په خیبرپښتونخوا کې د مورنیو ژبو پر وړاندې تبعیض غندلی او غوښتنه یې کړې چې د ۱۸م اساسي قانون تعدیل لاندې دې ټولې مورنۍ ژبې په ځانګړې توکه په تعلیمي نصاب کې د جبري مضمون په توګه شاملې شي.
یاد ګوند د پاکستان په دولتي ټلوېزیون کې د پښتو خپرونو بندول هم وغندل او د بېرته پیل کېدو غوښتنه یې کړې ده.
د یادونې وړ ده، چې له دې وړاندې هم د عوامي نشنل ګوند مشر اېمل ولي خان ویلي، چې په پاکستان کې د هرې پېښې تور له فکر پرته پر افغانستان لګول کیږي.
پاکستاني رسنیو راپور ورکړی، چې د خیبر پښتونخوا په بېلابېلو سیمو کې د دوو جلا وسله والو بریدونو په پایله کې څلور پاکستاني پولیس وژل شوي دي.
د پاکستاني رسنۍ «جیونیوز» د راپور له مخې، پولیسو ویلي، چې نن یکشنبه (د مرغومي ۱۴مه) ناپېژانده موټرسایکلسپرو وسله والو په لکي مروت کې د ټرافیکو پر پولیسو ډزې کړې، چې په نتیجه کې یې درې د ترافیکو پولیس وژل شوي دي.
د پولیسو په وینا، په بنو کې په یوه بل وسله وال برید کې هم یو بل د پولیسو افسر وژل شوی دی.
د خیبرپښتونخوا اعلی وزیر د وژل شویو پولیسو له کورنیو سره خواخوږي څرګنده کړې او ویلي یې دي، چې «د دولت ضد عناصر» به خپلو ناوړه موخو ته ونه رسېږي.
د پاکستان چارواکي ډېری وخت د دغو بریدونو پړه پر تحریک طالبان پاکستان (ټيټيپي) اچوي او ادعا کوي، چې دغه ډله د افغانستان له خاورې د پاکستان پر وړاندې خپل بریدونه تنظیموي، خو طالبانو دا ادعاوې تل رد کړي او وایي چې ټي ټي پي د پاکستان کورنۍ مساله ده.
افغانستان انټرنشنل - پښتو ته د حقانیه مدرسې یو شمېر سرچینو ویلي، چې د امنیتي ګواښونو له امله د حقانیه مدرسې د دستاربندۍ غونډه چې د روانې عیسوي میاشتې په ۸مه نېټه کېدونکې وه ځنډول شوې ده. د حقانیه مدرسې ویاند مولانا یوسف شاه د دستاربندۍ د غونډې د ځنډېدو پخلی کړی دی.
سرچینې وايي، چې د حقانیه مدرسې مشرتابه تېره ورځ خپل منځي غونډه کړې ده او د یادې مدرسې کلنۍ دستاربندي یې ځنډولې ده.
هغه اعلامیه چې د یادې مدرسې له خوا افغانستان انټرنشنل - پښتو ته لېږل شوې ده، پکې د دستاربندۍ غونډې د ځنډېدو علت په پاکستان کې روانه ناامني ښودل شوې ده.
د ۲۰۲۵ کال د فېبروري په ۲۸مه د حقانیه مدرسې پخوانی مهتمم مولانا حامد الحق هم په مدرسه کې په یوې بمي چاودنه کې وژل شوی و.
بل خوا د یادې مدرسې ویاند مولانا یوسف شاه وايي، دا چې د یادې مدرسې کلنۍ ازموینې روانې دي نو ځکه یې د دستار بندۍ غونډه ځنډولې ده.
نوموړي د افغانستان انټرنشنل - پښتو د دغې پوښتنې په ځواب کې چې ایا یادې مدرسې ته امنیتي ګواښونه شته، وویل: "د صوبې مجموعي صورتحال خراب دی او د امن و امان مساله موجوده ده".
هغه د پاکستان له پوځي ادارو او سیاسي مشرانو غوښتنه وکړه چې دوی دې د امنیت په مسالې جدي غور وکړي او کوټلي ګامونه دې پورته کړي.
په خیبرپښتونخوا کې څېړونکي او خبریال شمیم شاهد افغانستان انټرنشنل - پښتو ته وویل چې د لومړي ځل لپاره د حقانیه مدرسې غونډه د امنیتي ګواښونو له امله ځنډېدلې ده.
نوموړي وویل: " دا وخت د حقانیه مدرسې د انتظامیې او پاکستاني ادارو تر منځ تعلقات تراخه دي".
د شاهد په خبره چې د پښتونخوا پخواني مشر وزیر علي امین ګنډا پور په افغانستان کې د طالبانو سره د خبرو لپاره د جوړ کړي پلاوي مشري د حقانيه مدرسې اوسني مهتمم شیخ الحدیث انور الحق حقاني ته سپارلې وه.
دا په داسې حال کې ده چې د پښتونخوا اوسنۍ سیاسي اداره د طالبانو په تړاو د پاکستان د پوځ او مرکزي حکومت پالیسي ناسمه بولي.
په پښتونخوا کې د حکومت په بلنه سیاسي ګوندونو او صوبايي چارواکو تېره میاشت په امن جرګه کې یو ځل بیا پر مرکزي حکومت غږ کړی و، چې له طالبانو سره دې روان کړکېچ د خبرو له لارې حل کړي.
په اکوړه خټک کې حقانیه مدرسه د افغانستان د طالبانو د مشرانو د زده کړو مهم مرکز ګڼل کیږي. د یادې مدرسې د چارواکو په وینا، چې د افغان طالبانو د اوسني مشرتابه سربېره پخوانی مشر ملا محمد عمر او جلال الدین حقاني له یادې مدرسې سره نېږدې اړیکې لرلې.
د دغې مدرسې پخواني وژل شوي مهتمم مولانا سمیع الحق حقاني په خپلو څو مرکو کې افغان طالبان د خپلو شاګردانو په توګه یاد کړي وو.
د شمالي وزیرستان په مېرعلي کې نن د جمعې په ورځ د سیمې د امن په ملاتړ او د ترهګرۍ پرضد لویه ولسي غونډه ترسره شوه. دې ولسي غونډې ته د پښتون ژغورنې غورځنګ ځینو مشرانو په خپلو ویناوو کې ویلي، چې د وزیرستان ولسونه په سیمه کې امن غواړي.
د رارسېدلو معلوماتو له مخې په دې ولسي غونډه کې، چې د پښتون ژغورنې غورځنګ د مشرانو ترڅنګ قومي مشرانو او ولسي خلکو کډون کړی و، په سیمه کې د پاکستان روان پوځي عملیات وغندل.
دوی وویل، چې د پاکستان پوځ په ډرون بریدونو کې عام پښتانه په نښه کوي او دوی په لوی لاس اړ باسل کېږي ترڅو له کورونو څخه ووځي.
په دې وروستیو کې د شمالي او جنوبي وزیرستان په ځینو سیمو کې د ټي ټي پي او د پاکستان پوځ ترمنځ سختې جګړې روانې دي او ځینو سیمو څخه د پاکستان پوځ ولسي خلک له کورونو څخه اېستلي دي.
ټيټيپي په خپل کلني رپوټ کې ادعا کړې چې په ۲۰۲۵ کال کې یې ټولټال ۳۵۷۳ بریدونه کړي، چې په پایله کې یې ۳۸۱۸پاکستاني امنیتي سرتېري وژل شوي دي. د پاکستان حکومت تر اوسه ددغه رپوټ په اړه غبرګون نه دی ښودلی، خو ۲۰۲۵ کال په تېره یوه لسیزه کې د پاکستان لپاره تر ټولو خونړی کال ګڼل شوی.
په رپوټ کې، چې د پنجشنبې په ورځ د مرغومي په ۱۱مه د تحریک طالبان پاکستان اړوندو اکاونټونو کې خپور شوی، دغه ډله ادعا کوي چې په همدې موده کې ۳۴۸۱ نور پاکستاني عسکر ټپیان شوي دي.
ټيټيپي همداراز ویلي چې د بریدونو پر مهال ۱۹۶ کسان تښتول شوي دي.
په رپوټ کې راغلي چې د بریدونو تر ټولو لوړ شمېر د اګست په میاشت کې ثبت شوی، چې ۵۵۶ پېښې پکې شاملې دي.
ورپسې جولای میاشت د ۳۶۰، سپټمبر د ۳۵۹ او اکتوبر د ۳۴۹ بریدونو شاهده ښودل شوې.
د رپوټ له مخې، د پاکستان پوځ تر ټولو زیات زیان لیدلی، چې د وژل شویو او ټپیانو شمېر یې ۳۸۶۷ ته رسېږي. ورپسې د سرحدي ځواکونو ۱۸۹۹، پولیسو ۱۴۰۵ او د پاکستان امنیتي او استخباراتي ادارو ۲۰۱ تلفات او ټپيان ثبت شوي دي.
له جغرافیایي پلوه، د تحریک طالبان پاکستان د خپرو شویو شمېرو له مخې، په ۲۰۲۵ کال کې تر ټولو زیات بریدونه په خیبر پښتونخوا ایالت کې شوي دي. ټيټيپي ویلي چې په شمالي وزیرستان کې یې۲۴۴، جنوبي وزیرستان کې ۲۴۲، بنو کې ۱۹۹، ډېره اسماعیل خان کې ۱۹۸ او لکي مروت کې ۱۱۷ بریدونه کړي دي.
تحریک طالبان پاکستان همداراز ادعا کړې چې د بلوچستان او پنجاب ایالتونه د بریدونو له پلوه په ورپسې ځایونو کې قرار لري.
په رپوټ کې ویل شوي چې بریدونو د چاودنو، ډلهییزو بریدونو، موټر بمونو، لیزري او راکټي بریدونو بڼه لرله او د دغو بریدونو پر مهال د پاکستاني ځواکونو یو شمېر وسلې او پوځي موټر هم د دې ډلې لاس ته لوېدلي دي.
له بلې خوا، د جنوبي اسیا د ترهګرۍ اړوند معلوماتو پورټال ویلي چې پاکستان په ۲۰۲۵ کال کې په تېره یوه لسیزه کې تر ټولو خونړی کال تېر کړی دی. د دې رپوټ پر بنسټ، په تېر یوه کال کې د پاکستان په بېلابېلو سیمو کې د تاوتریخوالي د پېښو پر مهال نږدې څلور زره کسان وژل شوي دي.
د پاکستان حکومت افغان طالبان د پاکستاني طالبانو په ملاتړ تورنوي، خو د طالبانو اداره دا تورونه په پرلهپسې ډول ردوي.