د خېبرپښتونخوا په بنو ولسوالۍ کې د چهارشنبې په ورځ د ډزو په دوو جلا پېښو کې لږ تر لږه درې کسان وژل شوي او اته نور ټپیان دي. په وژل شویو کسانو کې د پېښور پوهنتون یو زدهکړیال هم شامل دی، چې تازه د رخصتیو لپاره خپل کور ته ستون شوی و.
پولیس وایي، لومړۍ پېښه د بنو د میتهخېلو په سیمه کې د دوو ډلو ترمنځ د نښتې پر مهال شوې چې پهکې درې کسان وژل شوي او شپږ نور ټپیان دي. ټپیان د درملنې لپاره د بنو ولسوالۍ مرکزي روغتون (DHQ) ته لېږدول شوي؛ خو د درېیو روغتیايي وضعیت د خرابوالي له امله هغوی پېښور ته لېږدول شوي دي.
د پولیسو په وینا؛ په وژل شویو کې حسن نومی ځوان هم شامل دی، چې د پېښور پوهنتون زدهکړیال و او په دې وروستیو کې د لنډو رخصتیو لپاره خپل کور ته تللی و. په بله جلا پېښه کې د مندن ګېټ په سیمه کې ناپېژاندو موټرسايکلسپرو پر یوه موټر ډزې کړې، چې له امله یې یو پولیس سرتېری او د هغه درې کلن زوی ټپیان شوي دي.
ځایي چارواکي زیاتوي، چې د دواړو پېښو عاملین لاتراوسه نهدي نیول شوي او پولیسو د بریدګرو د نیولو لپاره عملیات پیل کړي دي. د بریدونو انګېزه هم تر څېړنې لاندې ده.
سرچینې وايي، چې د حقانیه مدرسې مشرتابه تېره ورځ خپل منځي غونډه کړې ده او د یادې مدرسې کلنۍ دستاربندي یې ځنډولې ده.
هغه اعلامیه چې د یادې مدرسې له خوا افغانستان انټرنشنل - پښتو ته لېږل شوې ده، پکې د دستاربندۍ غونډې د ځنډېدو علت په پاکستان کې روانه ناامني ښودل شوې ده.
د ۲۰۲۵ کال د فېبروري په ۲۸مه د حقانیه مدرسې پخوانی مهتمم مولانا حامد الحق هم په مدرسه کې په یوې بمي چاودنه کې وژل شوی و.
بل خوا د یادې مدرسې ویاند مولانا یوسف شاه وايي، دا چې د یادې مدرسې کلنۍ ازموینې روانې دي نو ځکه یې د دستار بندۍ غونډه ځنډولې ده.
نوموړي د افغانستان انټرنشنل - پښتو د دغې پوښتنې په ځواب کې چې ایا یادې مدرسې ته امنیتي ګواښونه شته، وویل: "د صوبې مجموعي صورتحال خراب دی او د امن و امان مساله موجوده ده".
هغه د پاکستان له پوځي ادارو او سیاسي مشرانو غوښتنه وکړه چې دوی دې د امنیت په مسالې جدي غور وکړي او کوټلي ګامونه دې پورته کړي.
په خیبرپښتونخوا کې څېړونکي او خبریال شمیم شاهد افغانستان انټرنشنل - پښتو ته وویل چې د لومړي ځل لپاره د حقانیه مدرسې غونډه د امنیتي ګواښونو له امله ځنډېدلې ده.
نوموړي وویل: " دا وخت د حقانیه مدرسې د انتظامیې او پاکستاني ادارو تر منځ تعلقات تراخه دي".
د شاهد په خبره چې د پښتونخوا پخواني مشر وزیر علي امین ګنډا پور په افغانستان کې د طالبانو سره د خبرو لپاره د جوړ کړي پلاوي مشري د حقانيه مدرسې اوسني مهتمم شیخ الحدیث انور الحق حقاني ته سپارلې وه.
دا په داسې حال کې ده چې د پښتونخوا اوسنۍ سیاسي اداره د طالبانو په تړاو د پاکستان د پوځ او مرکزي حکومت پالیسي ناسمه بولي.
په پښتونخوا کې د حکومت په بلنه سیاسي ګوندونو او صوبايي چارواکو تېره میاشت په امن جرګه کې یو ځل بیا پر مرکزي حکومت غږ کړی و، چې له طالبانو سره دې روان کړکېچ د خبرو له لارې حل کړي.
په اکوړه خټک کې حقانیه مدرسه د افغانستان د طالبانو د مشرانو د زده کړو مهم مرکز ګڼل کیږي. د یادې مدرسې د چارواکو په وینا، چې د افغان طالبانو د اوسني مشرتابه سربېره پخوانی مشر ملا محمد عمر او جلال الدین حقاني له یادې مدرسې سره نېږدې اړیکې لرلې.
د دغې مدرسې پخواني وژل شوي مهتمم مولانا سمیع الحق حقاني په خپلو څو مرکو کې افغان طالبان د خپلو شاګردانو په توګه یاد کړي وو.