د ایران د اسلامي شورا مجلس د ملي امنیت او بهرني سیاست کمیسیون غړی فداحسین مالکي وايي، چې د جنرال اکرام الدین سریع قاتل نیول شوی. یاد کمیسیون ویلي چې د افغانستان ستونزې باید تهران او مشهد ته ونه غځول شي. د مالکي په وینا، د جنرال سریع ترور له بهره پلان شوی و.
د ایران د اسلامي شورا مجلس د ملي امنیت او بهرني سیاست د کمیسیون غړي فداحسین مالکی ایراني رسنیو ته ویلي، چې د افغانستان د جمهوري نظام د تخار امنیه قوماندان او د طالبانو د یوه مخالف جنرال، چې په تهران کې وژل شوی و، د ترور عامل نیول شوی دی.
فداحسین مالکي وايي، دا پېښه او هغه نورې پېښې چې په ایران کې شوې او ځینې پخواني افغان پوځیان په مشهد او تهران کې وژل شوي، د خواشینۍ وړ دي. نوموړی وايي، د ایران د ډیپلوماسۍ دستګاه پر وخت دا پېښه وغندله او د هېواد بېلابېلو ادارو هم لازمې څېړنې کړې دي.
هغه زیاته کړه چې د ایران امنیتي ادارې، په ځانګړي ډول د کورنیو چارو وزارت، د دې موضوع په اړه حساس دي او د افغانستان ځینې ستونزې او مسایل باید ایران ته ونه غځول شي.
نوموړي زیاته کړې، « دا موضوع به حتمي د ملي امنیت د کمیسیون او امنیتي ادارو تر جدي پام لاندې وي».
مالکي د آوش رسنۍ د دې پوښتنې په ځواب کې چې ایا بریدګر نیول شوی که نه، ټینګار وکړ، چې د وروستيو معلوماتو له مخې چې دوی ته رسېدلي، عامل نیول شوی دی، خو د جزئیاتو په اړه باید د کورنیو چارو وزارت رسمي رپوټ ورکړي.
هغه د دې پوښتنې په ځواب کې چې ایا د اکرام الدین سریع د وژل کېدو عامل په تهران کې دی او که طالبانو ته سپارل شوی، وویل: «هغه په ایران کې نیول شوی دی».
د ایران د مجلس د ملي امنیت او بهرني سیاست د کمیسیون یاد غړي زیاته کړې چې ډېری اټکلونه دا دي چې دا پېښه له بهر څخه هدایت شوې ده.
هغه زیاته کړې، « زه نه ګڼم چې عامل دې شخصي انګېزه لرلې وي. د هغو خبرو او رپوټونو پر بنسټ چې له مشهد څخه موږ ته رسېدلي، دا اقدام په واردمخه پلان او تنظیم، شوی دی».
د تخار پخوانی امنیه قوماندان او د طالبانو مخالف جنرال اکرام الدین سریع د مرغومي پر درېیمه نامعلومو کسانو د تهران په ولیعصر ښارګوټي کې په ډزو وواژه.
اکرامالدین سریع د تخار د پولیسو پخوانی قوماندان و او د طالبانو تر واکمنېدو وروسته ایران ته تللی و.
هغه د ۱۴۰۳ کال په لړم میاشت کې د لنډ وخت لپاره ایراني ځواکونو نیولی و او وروسته یې بېرته خوشی کړی و.
له دې وړاندې د ایران د پلازمېنې تهران والي حسین خوشاقبال ویلي و چې د سریع د ترور قضیه تر جدي څېړنو لاندې ده او ډیر ژر به یې پایلې روښانه کړي.
خوشاقبال ویلي و چې د جنرال سریع د وژل کېدو په اړه پلټنې روانې دي، خو تر اوسه کومې وروستۍ پایلې ته نه دي رسېدلي.
