پوتین د سعودي عربستان له ولیعهد سره د انرژۍ د نړیوالو بازارونو پر ټیکاو غږېدلی
د روسیې ولسمشر ولادیمیر پوتین او د سعودي عربستان ولیعهد محمد بن سلمان د ټیلیفوني خبرو پر مهال د اوپیک پلس په چوکاټ کې پر ګډو هڅو او د انرژۍ نړیوالو بازارونو د ثبات پر موضوع خبرې کړې دي. د سعودي دولتي اژانس ویلي، چې دواړه مشران د سیمې او نړۍ پر وضعیت هم غږېدلي.
د کرملین د اعلامیې له مخې، دواړو مشرانو هوکړه کړې چې په سیاسي، اقتصادي، سوداګریزو او بشري برخو کې خپلمنځي همکاري نوره هم ژوره کړي.
بل خوا، د سعودي دولتي خبري اژانس ویلي چې د دواړو هېوادونو مشران د دوهاړخیزو اړیکو ترڅنګ پر سیمهییزو او نړیوالو بدلونونو هم غږېدلي دي.
