په افغانستان کې د کورنۍ د تنظیم نړیوال سازمان ډيکېټي مسوولان وايي، چې د طالبانو له بندیزونو سره سره، په ۲۰۲۴ کال کې د دوی د کورنۍ د تنظیم خدماتو له لارې د ۲۹۸ زره ناغوښتو امیندواریو مخه نیول شوې. وړاندې داسې رپوټونه ورکړل شوي وو چې طالبانو د زیږون د مخنیوي فعالیتونه بند کړي.
په افغانستان کې ددغه سازمان مسوولې ګیګیه یودهیسترا ګارډین ورځپاڼې ته ویلي، په افغانستان کې د کورنۍ تنظیم ډېری وخت د «زیږون ترمنځ واټن» په نوم وړاندې کېږي، چې دا طریقه د ټولنې له تمو او اسلامي اصولو سره سمون لري.
د نوموړې په وینا، ډيکېټي افغانستان، چې په خصوصي سکتور کې ثبت شوې یوه معالجوي اداره ده ، توانېدلې چې د کلتوري او مذهبي ارزښتونو په چوکاټ کې کار کولو سره د کورنۍ د تنظیم او د میندو د روغتیا خدمتونه جاري وساتي.
ډيکېټي افغانستان په ۱۳ ولایتونو کې له څه باندې ۳۸۰۰ خصوصي پلورنځیو سره کار کوي او په کابل او بلخ کې له کلینیکونو او د ټولنې له قابلو شبکو سره همکاري لري.
ګیګیه یودهیسترا ویلي، یوازې په ۲۰۲۴ کال کې دغو خدمتونو نږدې ۷۰ زرو مراجعینو ته رسېدنه کړې، چې له دې ډلې څه باندې ۴۰ زرو یې د کورنۍ د تنظیم خدمتونه ترلاسه کړي دي.
د رپوټ له مخې، د دغه لاسرسي له لارې په ۲۰۲۴ کال کې اټکل کېږي چې د شاوخوا ۲۹۸ زره ناغوښتو امیندواریو او له ۳۴۰ څخه د ډېرو میندو د مړینې مخنیوی شوی دی.
ګیګیه یودهیسترا ددې ترڅنګ په افغانستان کې د ښځو پر ناسم وضعیت اندېښنه څرګنده کړې او ویلي یې دي، چې پرمختګ، که څه هم نازک او اسیب پذیره دی، خو لا هم ممکن دی.
ډی کې ټي په افغانستان او پاکستان کې د کورنۍ تنظیم او د میندو د روغتیا په برخه کې کار کوي. دا نوم د ډي. کې. تیاګي په یاد ایښودل شوی، چې په هند کې د کورنۍ تنظیم یو مخکښ و.
یاده روغتیايي موسسه په افغانستان او پاکستان کې د امیندوارۍ د مخنیوي وسایل لکه کنډوم او نور روغتیايي خدمات په ټیټه بیه وړاندې کوي.
