د تېر جمهوري نظام پرمهال په اسلاماباد کې د افغانستان سفیر نجیب الله علي خېل ویلي، چې پر افغانستان د پاکستان بمباري د دغه هېواد د اوږدمهاله تګلارې یوه برخه ده او د افغان ملي ګټو د ساتنې یوازینۍ لار د هېواد ملي یووالی، پراخه ډېپلوماټیکې هڅې او ټولګډونه دفاع ده.
نجیبالله علی خېل پر اېکس پاڼه لیکلي، چې د پاکستان وروستي بریدونه کومه نوې پالیسي نهښيي؛ بلکې د دغه هېواد اوږدمهاله تګلارې ته دوام ورکوي، کومه چې په تېرو کلونو کې یې د ډلو له لارې د افغانستان په زیان کار کاوه.
هغه زیاته کړې، چې د جګړې د ګټې اخیستلو یوازینۍ لاره په ملي انسجام، ډېپلوماټیکو هڅو او پراخو رسنیزو فعالیتونو کې ده. د هغه په وینا؛ که افغانان د خپلو ملي ګټو پربنسټ یووالی ترلاسه کړي او هېواد پیاوړی شي؛ نو هېڅ ګاونډی یا بهرنی ځواک به جرات ونهلري، چې د افغانستان په وړاندې یرغل وکړي.
نجیبالله علی خېل دارنګه ویلي، که افغانانو له تېرو تجربو زدهکړه ونه کړي؛ نو ښايي ورته ننګونې د راتلونکو ۵۰ کلونو لپاره دوام وکړي. هغه ټینګار کړی، چې ځینې کسان د پاکستان د بمبارۍ د توجیه کولو هڅه کوي؛ خو دا د ملي ګټو په وړاندې ستره ستونزه ده او افغانستان باید د خپل ملي یووالي او خپلواکۍ پربنسټ د ټولو ننګونو پر وړاندې پیاوړی دریځ غوره کړي.
