د جرمني لومړی وزیر: ایران باید اټومي وسلو ته لاسرسی و نه لري
د جرمني لومړي وزیر فریدرېښ مېرڅ، یو ځل بیا د ایران د اټومي پروګرام په اړه د امریکا له دریځ څخه ملاتړ اعلان کړی او ټینګار یې کړی چې تهران باید اټومي وسلو ته لاسرسی و نه لري.
مېرڅ په ایکس خواله رسنۍ کې په خپره کړې اعلامیه کې لیکلي: «متحده ایالات د شمالي اتلانتیک په اتحاد کې د جرمني تر ټولو مهم شریک دی او همداسې به پاتې شي.»
نوموړي زیاته کړې: «موږ یو ګډ هدف لرو: باید ایران ته اجازه ور نه کړل شي چې اټومي وسلو ته لاسرسی ومومي.»
د جرمني لومړی وزیر دا څرګندونې په داسې حال کې کوي چې د ایران د اټومي پروګرام په اړه نړیوالې اندېښنې لا هم پر ځای دي او لوېدیځ هېوادونه هڅه کوي د ډیپلوماتیکو او اقتصادي فشارونو له لارې د دې پروګرام مخه ونیسي.
