فېسبوک د لنډې مودې لپاره په یو شمېر هېوادونو کې له کاره لوېدلی و
د راپورونو پر بنسټ د نړۍ په ګڼو هېوادونو کې د فیسبوک او مسنجر خدمات د ناڅاپي تخنیکي ستونزې له امله د لنډې مودې لپاره په ټپه درېدلي وو. د دې ستونزې له امله په میلیونونو کاروونکي په اتومات ډول له خپلو حسابونو څخه ایستل شوي او د بېرته ننوتلو پر مهال له ستونزې سره مخ کېږي.
بل خوا د مېټا کمپنۍ نور خدمات لکه واټساپ او انسټاګرام بیا هم فعال پاتې وو.
د راپورونو لهمخې، د مېټا تخنیکي ډلو د دې ستونزې د حل لپاره هڅې وکړې او د فیسبوک او مسنجر خدمات بېرته فعال شوه.
دا لومړی ځل نه دی چې د مېټا تر چتر لاندې خواله رسنۍ له داسې پراخو تخنیکي ستونزو سره مخ کېږي، خو د فېسبوک او مسنجر هممهاله قطع کېدو په نړیواله کچه د کاروونکو ترمنځ اندېښنې راپارولې دي.
