د ننګرهار یو شمېر اوسېدونکي: « ښاروال خپل په فساد ککړ ملګري ګومارلي»
د ننګرهار ولایت یو شمېر اوسېدونکي ادعا کوي چې د جلالاباد ښاروال قاري بسم الله بلال که څه هم څو ځله له خپلې دندې بدل شوی، خو د دوی په وینا، «د طالبانو دننګرهار د والي او د کورنیو چارو وزارت معیین د ملاتړ له امله په خپل مقام پاتې دی او خپل په فساد ککړ څلور ملګري یې هم ګومارلي دي».
افغانستان انټرنشنل ته په رسېدلو پیغامونو کې د ننګرهار یو شمېر اوسېدونکو ادعا کړې چې نوموړي د خپل تقرر پر مهال یو شمېر کسان له ځان سره ښاروالۍ ته راوستي او د نورو رسمي مامورینو پر ځای یې د ښاروالۍ مهمې چارې ور سپارلې دي.
ددغو اوسېدونکو د ادعا له مخې، په دغو کسانو کې د عوایدو امر اکبرعلي بریال، د قراردادونو امر طارق، د دفتر امر ذاهب الله او د تفتیش امر نورخان نوراني یاد شوي.
دغو کسانو ویلي، چې د ښاروالۍ زیات شمېر اداري بدلونونه او مقررۍ د اړیکو پر بنسټ کیږي او ځینې مامورین د همدې وضعیت له امله له فشار او اندېښنې سره مخ دي.
یو شمیر مامورینو ادعا کړي چې د شکایت کولو توان نه لري، ځکه د دوی په وینا، د شکایت په صورت کې له دندې د ګوښه کېدو له ګواښ سره مخ کېږي.
د طالبانو د ننګرهار ولایت ښاروال او هغو کسانو، چې په دغه روایت کې ترې شکایت شوی، د یادو ادعاوو په اړه تر دې دمه څه نه دي ویلي او نه هم افغانستان انټرنشنل دغه ادعاوې تاییدولی شي.
