د افغان نجونو د کرېکټ لوبډله د طالبانو د ظالمانه سیاستونو ضد د درېدو روحیه راکوي

هیمیش فالکنر د جمعې په ورځ پر خپله اېکس پاڼه لیکلي، خوښ دی چې یو ځل بیا یې د افغان کډوالو د ښځو د کرېکټ له لوبډلې سره ولیدل. نوموړي زیاته کړې، افغان ښځینه لوبغاړو د برېتانیا له پارلمان څخه لیدنه وکړه او د هغوی د کرېکټ مهارتونه یې له نږدې څخه ولیدل.

نوموړي زیاته کړه، د دغو لوبغاړو لېوالتیا او کلک هوډ دا په ډاګه کوي چې نړیواله ټولنه باید په افغانستان کې د طالبانو له لوري د ښځو او نجونو پر وړاندې د «وحشتناک چلند» په مقابل کې په کلکه ودرېږي.

د راپورونو له مخې، د افغان پناه غوښتونکو ښځینه کرېکټ لوبډلې بریتانیا ته د خپل تاریخي سفر په ترڅ کې له پاچا چارلز درېیم سره وکتل او په کمبرېج کې یې دوه نمایشي لوبې ترسره کړې. په دغو سیالیو کې افغان لوبډلې د بریتانیا د وسله والو ځواکونو له ښځینه لوبډلې سره لوبه وکړه، چې په کې د بریتانیا لوبډلې په ۲۰ اورونو کې د ۷ ویکټو په زیان ۱۴۹ منډې وکړې او افغان لوبډلې ته یې د ۱۵۰ منډو هدف وټاکه، خو افغان لوبډلې د ۵۲ منډو په توپیر دا لوبه وبایلله.

دا په داسې حال کې ده، چې طالبانو له ۲۰۲۱ کال راهیسې پر افغان ښځو او نجونو پراخ محدودیتونه لګولي دي. د نجونو له شپږم ټولګي پورته زده کړې او پوهنتون ته یې په ورتګ بندیزونه لګولي دي. ښځې له ډېرو دولتي او نادولتي دندو منع شوې او د هغوی پر تګ راتګ، ټولنیز حضور او ورزشي فعالیتونو هم سخت محدودیتونه لګېدلي دي. همدې محدودیتونو د افغان ښځو د کرېکټ ملي لوبډله هم اړ کړې چې له هېواده ووځي او په جلاوطنۍ کې خپلو فعالیتونو ته دوام ورکړي.