طالبان: په بغلان کې د شاتو د تولید نږدې ۳۸۰ فارمونه فعال دي
په بغلان کې د طالبانو د کرنې، اوبو لګولو او مالدارۍ ریاست خبر ورکړی، چې دا مهال په دغه ولایت کې د شاتو د تولید نږدې ۳۸۰ فارمونه فعال دي او هرکال له ۲۵ تر ۳۵ مټریک ټنه شات تولیدوي.
د یاد ریاست رسنیز مسوول محمد ولي امرخېل ویلي، چې د شاتو تولیدوونکو د ملاتړ او پیاوړتیا لپاره هڅې روانې دي؛ څو د دغه سکټور ظرفیتونه پراخ، د تولید کچه لوړه او د بازارموندنې بهیر لا اغېزمن شي. د نوموړي په وینا؛ د بغلان شات د لوړ کیفیت له امله په سیمهییزه کچه ځانګړی شهرت لري او د دغه صنعت د لا پراختیا لپاره تخنیکي او اقتصادي ملاتړ په دوامداره توګه ترسره کېږي. بلخوا د شاتو یوشمېر تولیدوونکو ویلي، که د بازارموندنې، بسته بندۍ او عصري تجهیزاتو په برخه کې لا ډېره همکاري ورسره وشي؛ نو د شاتو د تولید کچه به زیاته شي. له بل پلوه د طالبانو د کرنې، اوبو لګولو او مالدارۍ وزارت وایي، چې د هېواد په کچه د شاتو مچیو د روزنې او د شاتو د تولید لپاره تر ۳۰زره ډېر فارمونه جوړ شوي. دغه وزارت څرګنده کړې، چې افغانستان اوسمهال د شاتو په برخه کې پر ځان بسیا دی او اړتیا نهشته چې له نورو هېوادونو شات وارد شي. د دغه وزارت ویاند مولوي شېرمحمد وایي: «د ټول هېواد په کچه ۳۰زره او ۲۰۰ د شاتو مچیو فارمونه فعالیت لري. ډېری فارمونه هرکال تر ۲زره ټنه ډېر شات تولیدوي».
طالبانو له واک ته رسېدو وروسته یو پراخ کمپاین پیل کړی چې د افغانستان ځوانان د طالباني تفکر پر لور جذب کړي، خو دې هڅو سره له دې چې د هېواد ستونزې نه دي اوارې کړي بلکې وضعیت یې لا نور ترینګلی کړی دی.
په تېرو دریو کلونو کې د دیني مدرسو شمېر د تېرو شلو کلونو پرتله پنځه برابره زیات شوی، چې اوس یې شمېر نږدې ۷۰۰۰ ته رسېدلی او لا هم زیاتېږي. افغانان اړ دي چې خپل اولادونه ښوونځي ته ولېږي، آن که دا ښوونځی مدرسه هم وي.
د طالبانو د پوهنې وزارت د مدرسو او دارالحفاظونو مشر عبدالرزاق صدیق رسنیو ته ویلي و: «افغانستان یوه مذهبي ټولنه ده او هر کس باید لومړنۍ او د لوړې کچې دیني زدهکړې ولري. له همدې امله موږ د دیني مدرسو وده ضروري بولو».
خو دا فکر آن د طالبانو دننه هم پراخ ملاتړ نه لري. ځینې طالب چارواکي وایي چې افغانستان یوازې طالب او ملا ته اړتیا نه لري بلکې انجینرانو او ډاکټرانو ته هم اړتیا ده. دا وضعیت نړۍ ته یو انزوا طلبه او افراطي افغانستان معرفي کوي چې نه یوازې کولتوري ستونزې لري، بلکې سیمه او نړۍ ته قوي امنیتي ګواښ هم پېښولی شي.
که څه هم افراطي فکرونه پراخېږي، خو ټکنالوژي دا وړتیا لري چې له افراطیت سره مبارزه وکړي. انټرنټ او رسنۍ هغه څه دي چې په اوسني عصر کې ورسره ځوانان په بېلابېلو ډولونو نښلول شوي دي. د شمېرو له مخې، د افغانستان ۶۷ سلنه وګړي لږ تر لږه میاشت کې یو ځل ټلوېزیون ګوري، چې دا ۱۲ میلیونه ماشومان او ۱۴ میلیونه ځوانان رانغاړي.
نجیب پیکان زیاتوي، چې تر ټولو مهمه مسئله له دې ځوانانو سره د اړیکو جوړول دي: «افغان ځوانان په دوو برخو وېشل کېدای شي. لومړی، تحصیلکرده او ناراضه ځوانان دي چې په میدان یوازې پرېښودل شوي او د بدلون ځواک یې له لاسه ورکړی. دا هغه ځوانان دي، چې که څه هم ناهیلې دي، خو د ځان ژغورلو یوازینۍ لاره د آزادې نړۍ سره همکاري ګڼي.دویم، هغه ځوانان دي چې د طالبانو په اداره کې دي؛ هغوی افراطي شوي. هر کال نیم میلیون طالبان له مدرسو فارغېږي او د افراطیت پر لور ګام اخلي.»
د حالاتو د بدلون لپاره باید له دواړو ډلو سره کار وشي. تر ټولو مهمه لاره دا ده چې د رسنیو، خبرو اترو، کنفرانسونو او مشورو له لارې د ځوانانو ترمنځ پل جوړ شي، ترڅو هغوی انتقادي فکر ته وهڅول شي او خپل بحثونه له دین او آخرت څخه ور هاخوا هم وغځوي.
دا ځوانان کار غواړي، او د کار موندلو لپاره اړیکو ته اړتیا لري. له هغو هېوادونو درس اخیستل کېدای شي، چې د ځوانانو کچه پکې لوړه ده، او دغه ځوانان د سمې لارې پر لور هڅول کېدای شي.
