د چین دولتي رسنیو راپور ورکړی چې د دغه هېواد په سویل ختیځ کې د بوټانو په یوه څو پوړیزه کارخونه کې د سختې اور لګېدنې له امله، چې کارګر یې په چت کې ایسار پاتې وو، لږ تر لږه ۲۸ کسانو خپل ژوند له لاسه ورکړی دی.
د چین د شینهوا خبري اژانس د راپور له مخې، دا اور د پنجشنبې په ورځ غرمه مهال د فوجیان ولایت په جینجیانګ ښار کې د بوټانو جوړولو په یوه کارخونه کې لګېدلی دی. د پېښې پر مهال په کارخونه کې ټولټال ۲۳۹ کسان موجود وو چې له هغې ډلې څخه ۲۱۳ یې په خوندي توګه ایستل شوي، خو دوه تنه یې روغتون ته تر رسېدو وروسته مړه شول. د راپور لهمخې، دغه راز ۲۶ نور کسان چې لومړی لادرکه وو، وروسته یې د مړینې پخلی وشو.
په خپرو شویو ویډیوګانو کې ښکاري چې د اور لمبې له ودانۍ خېژي، تور دود اسمان ته پورته کېږي او شاوخوا لس دولس کارګر په چت کې د دودونو ترمنځ د ژغورنې په تمه ایسار پاتې دي.
لومړنۍ موندنې ښيي چې اور د کارخونې په لومړي پوړ کې لګېدلی دی. چارواکو ویلي چې په ودانۍ کې ساتل شوي د بوټانو خام توکي او سرېښ خورا ګړندي اور اخیستونکي وو، چې له امله یې اور په ټوله ودانۍ کې په چټکۍ خپور شو.
په ورته مهال د چین ولسمشر شيجین پینګ د دغې پېښې په غبرګون کې د ژغورنې د هراړخیزو هڅو امر کړی او ویلي یې دي چې دغه اور درانه ځاني تلفات اړولي دي. نوموړي زیاته کړې چې دا پېښه د تېرو څو میاشتو له خونړیو صنعتي پېښو وروسته رامنځته شوې او له چارواکو یې وغوښتل چې مسوول کسان په کلکه ځواب ویونکي کړي.
د راپورنو لهمخې، تر دې دمه د کارخونې مالکان او نور اړوند کسان نیول شوي او د شرکت بانکي حسابونه هم کنګل شوي دي. که څه هم تر مازیګر پورې د اور ښکاره لمبې مړې شوې وې، خو لا هم له سیمې دود پورته کېده او اور وژونکو پر ودانۍ د اوبو شیندلو ته دوام ورکاوه.
