سینټکام: امریکا د بریدونو په وروستي پړاو کې په ایران کې شاوخوا ۹۰ پوځي موخې په نښه کړې دي
د امریکا مرکزي قوماندانۍ (سینټکام) ویلي، امریکايي ځواکونو د ایران پر وړاندې د بریدونو په وروستي پړاو کې شاوخوا ۹۰ پوځي موخې په نښه کړې دي. یادې مرکزي قوماندانۍ زیاته کړې، چې دغه بریدونه د تېرې شپې د عملیاتو دوام و.
د سېنټکام په وینا؛ په دغه موخو کې د هوايي دفاع سیستمونه، د ساحلي څار تجهیزات، د توغندیو او بېپیلوټه الوتکو د ساتنې ځایونه، سمندري پوځي وړتیاوې او د ایران د ساحلونو په اوږدو کې پوځي لوژستیکي تاسیسات شامل دي.
سېنټکام زیاته کړې، دغه بریدونه د تېرې شپې د عملیاتو دوام و چې پرمهال یې شاوخوا ۸۰ پوځي موخې، د سپاه پاسداران تر ۶۰ زیاتې چټکې پوځي بېړۍ هم په نښه شوې وې. د یادې قوماندانۍ په وینا؛ دغه عملیات په هرمز تنګي کې د ایران د حکومت لهخوا پر درېیو سوداګریزو بېړیو د برید په غبرګون کې شوي دي.
ورته مهال د امریکا ولسمشر ډونالډ ټرمپ ویلي، د واشنګټن وروستي بریدونه پر درېیو بېړیو د ایران د برید په غبرګون کې شوي. هغه خبرداری ورکړی، چې د ایران هر نوی برید به له «۲۰ چنده سخت» ځواب سره مخ شي.
