په کابل کې غلو لوټلی ځوان: «ربه بېوسي دې وای خو دومره ډېره نه»
د کابل یو اوسېدونکی قاهر کمال وایي چې په پلازمېنه کابل کې په رڼا ورځ وسلهوالو غلو پرې برید کړی، د نوموړي ټول توکي یې ترې اخیستي او تندی یې په بېرحمۍ سره ورڅیرلی. نوموړي پر خپله فېسبوک پاڼه لیکلي چې په دغه برید کې له سختې بېوسۍ سره مخ شوی و او غلو پرې هېڅ رحم ونه کړ.
قاهر کمال د دغې پېښې د جزییاتو په اړه لیکلي، که یې چيرې یې خپل سر لږ ښکته کړی نه وای، نو ښايي د سترګې په څېر یو لوی نعمت یې له لاسه ورکړی وای. هغه زیاتوي چې غلو لومړی د هغه هر څه واخیستل او په پای کې یې په یو بېرحمانه ګوزار سره د هغه تندی ور ټپي کړ چې سخت پرهر پرې جوړ شوی دی.
د دا کابل اوسېدونکی په خپلو خبرو کې د ټولنې پر هغو عامیانه اصطلاحاتو او متلونو سختې نیوکې کوي چې وایي «د نارینه وجود په پرهرونو ښه ښکاري». د هغه په وینا، په دغو اصطلاحاتو او معقولو کې د مسلمانۍ او انساني عواطفو هېڅ څرک نه لیدل کېږي او همدې بېارزښته خبرو په ټولنه کې ډېرو خلکو ته د وحشتونو او بېرحمۍ روحیه ورکړې ده.
ښاغلي کمال په پای کې لیکلي چې په ژوند کې د هېڅ شي لپاره دومره نه دی خفه شوی، لکه د غلا د هغې لحظې بېوسۍ ته چې احساس کړې یې وه. هغه په خپل یادښت کې کښلي چې په هغه سخته شېبه کې یې په زړه کې تېره شوه: «ربه بېوسي دې وای خو دومره ډېره نه.»
