په مالیزیا کې د طالبانو سفارت ویلي چې ددغه هیواد د «نشر القران» ادارې او «رستو» بنسټ په ګډه همکاري افغانستان ته د قران کریم د ۴۰ زره نسخو د چاپ بهیر پیل شوی. د دغو نسخو یوه برخه به له پښتو ژباړې سره چاپ شي.
د طالبانو د کور او ښار جوړولو وزارت وايي چې د کندز ولایت د عسقلان د کډوالو ښارګوټي تفصیلي پلان لاسلیک شو. دغه ښارګوټی په ۳۲۹۴ جریبه ځمکه کې طرحه شوی چې د ۲۵۹۸ استوګنیزو نومرو ترڅنګ پکې د اړینو عامه، خدماتي، اداري او ټولنیزو تاسیساتو لپاره هم ساحې ځانګړې شوې دي.
د طالبانو د امارتي شرکتونو ریاست ویلي، د اریانا افغان هوايي شرکت د بوینګ ۷۳۷ الوتکې ۲،۳ میلیون ډالري انجن چې په امریکا کې د ګمرکي پروسو له امله ځنډېدلی و، د اړوندو پړاوونو له بشپړېدو وروسته کابل ته انتقال شوی.
د ایران د بهرنیو چارو وزیر عباس عراقچي وايي، تر هغه چې واشنګټن د جون میاشتې له لنډمهالې هوکړې سرغړونه کوي، تهران به له امریکا سره مذاکرات پیل نه کړي. نوموړي زیاته کړې چې اوسمهال دواړه لوري یوازې د منځګړو له لارې پیغامونه تبادله کوي.
په بدخشان کې سرچینې وايي، د سرو زرو پر استخراج د طالبانو د مشر له بندیز سره سره، د جمعه خان فاتح اړوند کسان په نسي ولسوالۍ کې لا هم په پراخه کچه پر استخراج بوخت دي. سرچینې وايي، د نوموړي اړوند شرکتونه د فعالیت جواز هم نه لري.
د افغانستان د پخواني ولسمشر لومړي مرستیال امرالله صالح ادعا کړې، چې د طالبانو ځینې مشران د عزیزي بانک له مشر «میرویس عزیزي سره په فساد کې» شریک دي. د نوموړي په وینا، عزیزي بانک د پانګونې لپاره پانګه نه لري او هڅه کوي د ډبرو سکرو د ارزانه قراردادونو له لارې ګټه ترلاسه کړي.
د طالبانو دریاست الوزرا اقتصادي مرستیال ویلي چې له دې وروسته به افغانستان ته له نورو هېوادونو واردېدونکي توکي او روغتیايي محصولات په هرات کې د نړیوالو تخنیکي معیارونو له مخې وازمویل شي. نوموړي سوداګرو ته خبرداری ورکړ چې بې کیفیته او زیان رسوونکي توکي وارد نه کړي.
د خیبر پښتونخوا سویلي وزیرستان په ټیټ سیمه کې ناپېژاندو وسلهوالو د دوو قبایلي مشرانو پر موټر ډزې کړي چې له امله یې حاجي ګل او ملک بادشاه وژل شوي دي.
د پاکستان جماعت اسلامي مشر حافظ نعیم الرحمن اعلان کړی چې دغه ګوند به د اګست په ۱۶مه د تېلو د بیو او د حکومت د اقتصادي سیاستونو پر ضد د هېواد په څلورو واړو ولایتونو کې احتجاجي پرلتونه وکړي.
د سعودي عربستان، ترکیې او پاکستان ترمنځ د دفاعي او امنیتي همکاریو له پراخېدو سره، شنونکي وايي د مکې نوی تړون ښايي د پاکستان او طالبانو ترمنځ د مستقیم پوځي ټکر احتمال کم او د دواړو لورو ترمنځ د منځګړیتوب لپاره د سعودي عربستان او ترکیې رول پیاوړی کړي.
د افغانستان پخوانی ولسمشر محمد اشرف غني لومړی مرستیال امرالله صالح وايي، د عزیزی بانک د فساد او جعلکارۍ قضیه لا نه ده تړل شوې او نوې ابعاد یې موندلي دي. نوموړي د عزیزی بانک د ۱۰ زره مېګاواټه برېښنا د تولید پروژه «دروغجنه» بللې او د هغې پر عملي کېدو یې شک څرګند کړی دی.
د طالبانو د معیار او کیفیت اداره وایي، سږ کال یې په لومړیو څلورو میاشتو کې د هېواد په بېلابېلو بندرونو کې له ۲،۱۸ میلیون ټنو ډېر وارداتي ودانیز توکي د کیفیت د کنټرول او تثبیت له پلوه ارزولي.
د هرات اوسېدونکي وايي، د طالبانو د امربالمعروف محتسبانو له لوري د ښځو پر وړاندې رواني ځورونې او فشارونه زیات شوي او ښځې د نیول کېدو له وېرې په عامه ځایونو کې له تګ راتګ څخه ډډه کوي.
له پاکستاني وګړو سره د واده شویو افغانانو او د هغوی د ماشومانو د راتلونکي په اړه اندېښنې زیاتې شوې دي. په داسې حال کې چې د افغان وګړو د بېرته ستنولو له تګلارې وروسته، پېښور محکمې ته د تابعیت، د اوسېدو حق او د کورنۍ د یووالي په اړه د افغانانو د قضیو شمېر هم ډېر شوی دی.
د جیمز ټاون څېړنیز مرکز په تازه راپور کې ویلي، چې د طالبانو له بیا واکمنېدو وروسته د کانونو استخراج د دې ډلې د عوایدو پر مهمو سرچینو بدل شوی، خو د کانونو چارې د شفافو دولتي ادارو پر ځای د طالبانو د مشرانو، وفادارو شبکو او بهرنیو منځګړو له لارې په متمرکز ډول اداره کېږي.
د طالبانو د مالیې وزارت اعلان کړی چې د تقاعد حقونو عمومي ریاست لخوا په ټاکل شوي یوولسم نوبتي مهالو ویش کې د لویې څارنوالۍ متقاعدین شامل دي چې د تقاعد حق به یې ورکړل شي.
د طالبانو د ریاستالوزرا اقتصادي معاونیت وایي، چې ملا عبدالغني برادر هرات ته سفر کړی او ټاکل شوې چې په دغه ولایت کې د یو شمېر مهمو اقتصادي پروژو د پرانیستې او پیل په مراسمو کې ګډون وکړي.
د طالبانو ویاند ذبیحالله مجاهد وايي، په ۱۴۴۷ هجري کال کې شاوخوا دوه میلیونه برېښنايي او نږدې یو میلیون کاغذي پېژندپاڼې وېشل شوې دي، چې له ډلې یې ۲۰ زره کاغذي پېژندپاڼې ماشومانو ته ورکړل شوې دي.
د طالبانو د عامې روغتیا وزارت اعلان کړی چې د راتلونکې پنجشنبې په ورځ به د اوو ولایتونو د طب له نارینه فارغانو څخه د اګزېټ ازموینه واخیستل شي.
د خیبرپښتنوخوا په بنو کې امنیتي ځواکونو د استخباراتي معلوماتو پر بنسټ په عملیاتو کې د جامدالله په نوم یو مهم وسلهوال قوماندان وژلی چې د بېپیلوټه الوتکو په کارولو کې یې تجربه لرله او د پاکستاني امنیتي ځواکونو د څارنې او بریدونو لپاره یې له دغو الوتکو کار اخیسته.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تیره ورځ شنبې ۳۰۷کډوالۍ کورنۍ چې شمیر یې ۱۵۳۷ تنه و له ایران او پاکستان نه افغانستان ته جبري ستنې کړل شوې دي.